les restrictions d'électricité pindant la guerre
par Ch'Zio le, 21/02/2006Vers 1943 l'compagnie d'électricité al nous rationnot. In n'devot pas consommer pus d'15 kWh par mos (ch'est un ordre ed grandeur, j'm'rappell' pus l'limite exacte), sinon in avot ein' surtaxe ou même ein' coupure ed courant. Cha suffisot tout juste, surtout l'hiver, pour s'éclairer et pour acouter Radio Londres su ch'poste ed T.S.F.
L'cache d'escalier, qui dév'not chambre noire quand in fermot ches deux portes d'in bas et d'in haut, étot alors min labo d'photo. J'avos fabriqué ein' tireuse qui servot aussi d'agrandisseur in artournant m'n'apparel photo pour m'servir ed l'optique comme objectif d'agrandich'mint. Mais i fallot y mettre ein' grosse ampoule qui consommot gramint, et j'voulos pas prél'ver su l'contingent d'kilowatt-heures ed mes parints.
Alors, ej m'ai souvenu d'mes essais " phase-neutre " ( vir ch'l'article " Min compteur électrique étot monté à l'invers") et j'ai installé ein' prise ed courant avec un fil ed phase et un fil branché sur un piquet d'terre dins l'cave, in d'sous d'el cache d'escalier.
Comme cha j'ai pu faire du labo photo sans être limité par la consommation électrique.
Après soixante-cinq ans i dot y avoir prescription et l'compagnie d'électricité ed Béthune (qui n'étot pas incor l'E.D.F.) al pourra pus m'attaquer in justice ! Et pis,
al avot qu'à brancher sin compteur à l'indrot! In fait, cha r'vénot à voler ed l'énergie électrique à ches allemands qui nous occupotes, et cha n'dos pas ete un péché si grave…