chés chicons du gardin
par Marie-Claire le, 08/03/2006min père i féjot toudis des endives, alors c'que j' m'in souviens, d'abord ché graines d' chicorée ales étotent semées au printemps, pis après cha quand l' racine ale étot prete à ete récoltée vers octope, i artirot chés feulles dont j'cros bien qu'in féjot rien du tout d'ailleurs, cha partot su l'tas d'fumier
et ché racines i les mettot in silo dins ch' gardin pour les r'prinde progressivement et pas tout avoir d'un coup
Pis après i mettot j' cros un mélanche d' sape et d'terre dins eune lessiveusse dù qui plantot ché racines, qui arsonnent à des grosses carottes
i fallot qu'cha reste au frais ale caffe ou dins eune pièce fraiche et i couvrot aussi d'un grand plastique noir, i faut réunir chés conditions pour qu' l'endive ale soit serrée et qu'ale reste blanque
y avot plusieurs lessiveusses qui tournotent pour toudis n'avoir tant qui avot des racines
et miracle au bout d' queque temps, in comminche à voir sortir chés ... chicons, et i m'sempe qu'in in récolte déjà au bout d' tros s'maines
Par rapport à cha y a un nom qui m'arvient ché wittloof, j'cros qu' chétot c' t'espèce là qu'min père i cultivot
witt : blanc et loof : feuilles, in flamand