l'hirondelle à Charlots
par klavzer jean marie le, 17/03/2006L’hirondelle à Charlot
Charlot ch‘est m‘pa. Ch’hirondelle in question, i l’a pas dégoter dins ches faubourgs, comme dins l’canchon, mais dins l’vitrine à Trognon, l’bistrot in face de l’fosse 16.
Des s’maines intières i collot s’n’eule su l’vitrine racachante, i devot même bafier su sin menton, rin qu’à l’raviser.
Un biau jour el tintation ale a été pu forte, i est intré pou d‘‘mander sin prix, trop quère pour li bien sur. Mais i fallot compter su l’roublardise du bistrotier qui i a fait des aringemints.
Contint, i a traversé toute l’cité in boutant s’mobylette, os avez compris mes gints ché pas d’l’osiau qui porte bonheur que ch’parle mais d’unne marque de pétrolette; du reste chéto marqué su l’réservoir rouche aussi gros qu’unne musette rimplie d’gaillètes.
Su sin quémin tout l’monte i souriot, pa i étot fort connu et in plus l’tableau i étot plutôt cocasse.
Par contre, inne qui n’a pas ri in l’véyant arriver din l’voyette, ché man. Ch’malheureux i n’a intindu des vertes et des pas murtes :
- té d’viens maboule m’homme!
- té vas t’tuer, ché à peine si te sais rouler à vélo!!
- t’as l’air d’un crapeau su unne boite d’allumettes!
- l’plus bieau té vas gruger d’frod t’aras des romatikes su tes oches.
Du coup pa i a eu s’chique coupée, i a même pas mingé s’ n’assiette de rassakache.
Ben intindu l’cat i a été dins l’horloche pindant quinze jours., forchémint m’pa i faisot toudis à s’mote.
Au bout d‘unne semaine, i savot à peu près rond’ler drot. Pour in arriver là i a manqué d’passer s’arme à gauche.
Drot comme unne planke i faisot l’tour ed l’ cité, j’l’ai ravisé passer uit fos d’vant mi, j’me dis i prind sin plaisi, et ben pas du tout,mes gins, m’pa i savot pu arrêter s’pétrolette.
Vert eud troulle, i a cugi l’pu simpe, i a rintré dins l’aïure au bout de l’rue.
Résultat d’tout cha, i a fait un tro à s’marrone, sin queute i étot l’doupe d’avant et i y’ avot inne poque à s’réservoir, même que cha faisot comme inne deuxième tiète à s’n’hirondelle. Tout défoutu m’pa i est r’venu, inne fos pus in boutant s’pétrolette!
Man ale a toudis l’dernier mot, i étot à peine dins l’voyette qu’ale i dit « Trognon i a su d’vinte inne pétrolette d’mande li si s’comère ale peut pas rapiech’ter t’marrone ».