l'vie d'artiste
par klavzer jean marie le, 19/03/2006L’vie d’artiste
Pa i étot artiste, ma disot, pou l’faire amarvöer romanichel, ale avot pas querre cha à causse t’chés répétitions et déplachemints, sins oublier ch’banquet de ste Cécile, forchémint m’pa i chucho pas de l’glache pour unne fos.
Ouais, i étot musicien, un tiot musicien, i savot pas lire unne partition, mais i avot l’rythme dins l’sang. Du coup ché li qui juot de l’grosse caisse à la Renaissance Lensoise, unne société d’accordéoneux.
Un biau jour i print s’voix d’raflatteux pour annoncher à ma qu’i avot unne sortie l’diminche suivant, unne « prestation à Malo », parlant pointu, croyant qu’cha amadourot s’moitié. Pinsses tu, ale y répond, su un ton peu amiteux « Eje cros qu’un annonce del pleufe ».
Les v’la à Malo, avec unne caleur du diape et des gaziaux comme du bo. Tout l’jour is ont jué morciau su morciau, boum, boum et ch’tin bo unne, boum!boum et ch’tin r’bo unne aute. Fallot les vir vider chés verres et chés flacons, si bien qu’à la fin i étotte si ronds que l’chauffeur du bus i n’a r’mis pu d’un dins ch’car.
Arv’nus à Lens, avec bien du mau is déchintte et is arprinte leus instrumints, m’pa i n’artrouvot pu s’grosse caisse, ale étot restée à Malo…….Les footbaleux d’l’USOL il l’ont ramenée l’diminche suivant.
Pa i oubliot s’caisse, m’femme ché les sous qu’ej prête, min garchon ses sorlets au vestiaire, mes tiots rogins ed dire merçi d’timps in timps et mi j’oublie s’que veux bien…i a pas à dire à m’mason, l’mémoire ché unne espécialité.