V'là ch'carbon!
par klavzer jean marie le, 28/03/2006Tiot v’là ch’carbon, va querre chele brouette amon pépère! Ej n’attindos qu’cha, rinte service à min père, i arniflot assez d’carbon pindant sin poste.
Pas question d’arlander, ech garte Voltaire i avot pon ker que chés monts d’carbon trinnent dins chelle rue. I tournot dins ch’coron comme unne mouke su un chuke.
Par timps d’pleufe i m’ arrivot ed prindre unne drache, si sec man ale criot « rinte chi min bradé, té va ramasser l’tienne ». Après que bazar, chele voyette chétot berdoule et compagnie, m’brouette ale balot dins chés fleurs. Min père qui parlot pas gramint, là i s’ratrappot « qué dalache, t’as œuvré comme un pourcheau garchon, m’raconte pas des cacoules t’as mal querqué ete brouette ». Man ale s’in mêlot et ben intindu ch’cat i restot dins l’horloche squ’à l’ brunne »
I fallot cafoter dins ch’flou pos artirer chés gaillettes, i n’avot pas gramint. Min père comme tous chés mineurs, i n’arménot dins s’musette, ch’maîte d’école i l’savot. In a eu drot à un problème su l’manque à gagner « d’une grande société telle que les houillères, employeurs de vos parents » tel que mes gins! M’père quand i a su cha, i m’a dit garchon, té vas démander à t’maite qu’ech su décidé à canger unne brouette de flou conte unne de gros carbon comme ch’ ti qu’in bale dins s’cafe. Min père i avot raison, si ch’fu i cauffot pas j’attrapo l’trannette au momint d’faire mes devoirs, du cop j’écrivo comme un manchot et ej n’éto pus l’premier.