Les jardinsassis su ch'banc
par klavzer jean marie le, 31/03/2006Ché pos grand cosse, mais ch’ti qu’min grand père i a fait, i est incor din m’tiête d’pus sossante ans. I l’avot fabriqué avec pos grand cosse, unne vielle planque, quate bouts d’queue et des viux claus ardrechés, es n’hache et pis unne scie dins un étui in bos, pou mesurer i avot ses pouches et ses dogts .
I l’avot adossé conte ech pignon in plein solel, face à ch’gardin, pou miux vir pousser chés fleurs et attinte canter chés salates, cha devot ête unne craque pasque mi j’ai jamais rin intindu. A forche d’ête assis su ch’banc aveuc min pépère ou mémère, m’tiête ale a comminché à s’rimplir.
I disot pas qu’des carabistoules pépère, i disot aussi qu’chés batalles cha servot qu’à faire des tros, comme ch’ti qu’i avot à s’gampe et qu’chés médalles chétot du grain pou chés paons, et pis i disot aussi qu’in d’vot jamais rabacier s’maronne d’vant l’injustice. Pus tard j’a compris s’qu’i voulot dire. I disot aussi qu’l’ouvrache cha n’tuot pas, à l’condition d’faire ducasse ed timps in timps. Ch’gardin i m’l’a expliqué in long et in larche, laicher chés viers dins l’tierre, qu’i folot rassaker chés picholis, laicher chés moniaux tranquile, pos sémer dru, i savot in parler des heures intières.
Mémère ale m’parlot du tiot jésus, d’ech pain qui fallot pos jech’ter et surtout d’faire unne crox d’sus avant d’ coper . Ale disot aussi qu’ ech devo tout minger m’soupe, autremint ech restro minguerlot. Qu’in étot ben sus banc là.
A forche d’ête assis d’sus un biau jour i s’est brisier, pépère i disot que chétot un nœud dins l’planque, ech pinse putôt qu’em tiête ale étot d’vénue trop lourte.
