adus qu'is sont chés oeufs
par klavzer jean marie le, 31/03/2006Pas cheux, aveuc des morcieaux d'plastiqque eud'dins, qu’monsieur kinder i vint par chintaines de miyons pous s’mette des miyars dins ses taces…. Nan, mi ch’parle, des vrais in vrai chocolat, cheux qu’in mingeot unne fos par an, quand ej dis qu’in mingeot , ej’devro putôt dire impiffrot.
Pou in arriver là, i fallot des cloques, tous chés jonnes is savote cha. A ch’t’heure, quand j’rapasse dins min coin, l’mitant d’chés égliches ales sont muettes et quéqu’fos décarcassées . Ej comprint pourquo in fait des chèques à chés tiots.
Que plaisi ed savoir que l'jour i s'rapprochot, tous les jours ej ravisot si i avot pos d'nuaches et si chés fleurs is poussotte. In avot d'l'ouvrache, mi et mes soeurs aveuc deus gardin, l'note et chti d'pépère et mémère. Rindez vos compte, l'peu qu'chés fleurs is étottent in avinche i fallot unne coupe d'heures pou tout artrouver. I n'avot pos qu'des gros oeufs, i avot auchi unne masse de chukades in fondant, ché s'que ch'préférot.
In pouvot vir des éfants dins tous chés gardins, cha houinnot tout partout. Et pis, pou arvénir à chés cloques, non seul'mint is avotent du courache pou faire tout ch'quémin, mais aussi d'l'idée pace que qand i pluvot, is mettote chés oeufs dins l'maison.