Les jardinsEl vélo à rétropédalache
par Ch'Zio le, 18/04/2006Min grand père i avot pris s'retraite à Blangy sur Ternoise. I étot fort isolé et, pour faire ses commissions, il i fallot in vélo. Comme i avot gramint d'côtes aussitôt qu'in s'écartot del vallée d'la Ternoise, i avot cugi un vélo à deux vitesses par rétropédalache d'el Manufacture d'Armes et de Cycles ed Saint Etienne (Photo 1).
Su ch'vélo l'chaîne al passe à l'arrière su deux pignons au liu d'in. Un tiot galet rinverse el mouvemint d'el chaîne et ch'est tout. (Photo 2). Ches cliquets ed ches pignons à roue libre i sont inversés. Si in pédale in avant in a l'grande vitesse (pétit pignon), et in pédalant in arrière in a el pétite vitesse (grand pignon).
Pédaler in arrière ch'a n'sanne pas naturel mais in s'habitue assez vite. Ech catalogue ed vélos i dit même que ches muscles les plus puissants d'el gambe, triceps et grand fessier, i sont miux utilisés dins l'rétropédalache que dins l'pédalache direct et qui s'fatigtent moins. Et pis faut vir el tête des gins quand vous les doublez dins eine côte in pédalant in arrière !
Ch'vèlo i est toudis in état d'marche et min garchon i s'in sert incore pour faire des démonstrations à ses élèves ou à ses collègues et i les épate toudis ! El plus viux ed d'mes arrière pétits garchons, i pourra commincher à juer avec, dins quatre ou chinq ans. Alors ch'vélo à rétropédalache i aura servi à six générations ed Zios…
Hirondelle Saint Etienne, ch'étot du solide !
( 2 photos)
