el tour de France de Annie D-Pailliot
par annie62110 le, 23/04/2006Aujoud'hui ché fête din l'quartier, in est tous assis devant l'maison sur eune chaise, y'a de l'famille qu'al est dechindu d'Hénin, ché voisins y rigolent avec nous, pour not'mère pas question d'cuisiner, in mingera tous des casse-croûtes, in f'ra briquet. El porte ed'devant al est grande ouverte, su ch'pick up papa y'a mis d'l'accordéon, y'a eune sacrée ambiance "in attin l'tour de France" y passe devant not maison, cha danse même su ch'trottoir, y in a deux qui font eune roubaisienne j'vous dit q'cha!
Ché premières voitures publicitaires al arrivent, cha klaxonne y'a d'el musique, des droles d'autos, j'ai eu des chewing gums, des carambars, des tiots paquets d'banania, plein d'images, des buvards, des capios in papier, ché gosses y sont fous d'joie.
Et pi l'vla!Yvette Horner avec s'n'accordeon, al est magnifique avec in grand capio d'palle, al est tout in haut d'in camion, al sourit à tout ché gins, quesqu'al ju bien, mais tout cha, cha passe vite.
A ch't'heure in attin les coureurs, au bout d'in momin eune auto annonche" l'ploton groupé va arriver".
Quand y passent, in diro in essaim d'abeilles cha bourdonne, mais j'sus continte, j'ai r'connu Louison Bobet, bio comme tout din sin maillot jaune. Et vla l'voiture balai, ché fini, mais y fait biau, in reste à l'cour ch'quartier y's'ra joyeux jusqu'au soir.