Les jardinsChes convois d'prisonniers in 1940
par Ch'Zio le, 09/05/2006In juillet-août 1940, gramint d'convois d'prisonniers, à pied et in rangs par tros ou quatre, ont traversé Bruay par l'route nationale, in direction d'Béthune.
In avot pitié d'ches paufes diapes et, su ches trottoirs, d'nombreux bruaysiens venotent leu apporter à boire et à minger, et aussi du linche d'arcange ou des médicamints, malgré qui n'avotent déjà pu grand cose pour eux-mêmes. Ches prisonniers essayotent aussi ed donner des lettres à invoyer à leus parints, mais i fallot faire attention car ches soldats allemands i s'aimotent pas du tout cha. Pour faciliter ches bonnes actions, i avot des rabatteux à l'sortie ed Divion qui arvénottent vite à vélo pour prévenir tout l'monde qu'un convoi d'prisonniers allot arriver à Bruay.
Un jour, profitant de l'inattention d'un soldat allemand, l'un d'ches prisonniers s'est ingouffré dins l'impasse Duquesne, in courant à perdre haleine et, in haut d'l'impasse, est intré dins eine cour. Mais in aut' soldat l'avot vu et armontot aussi l'impasse in courant.
L'femme qui l'avot vu intrer dins s'cour al i dit "J'peux pas t'mucher, car ch'soldat i a vu qu't'étot rintré ichi, mais j'vas t'arringer cha : vas vite dins ches cabinets et baisse et' marronne ! " Et quand ch'soldat allemand i est arrivé, al i a expliqué, avec gramint d'gestes, que ch'prisonnier i avot la diarrhée et qui voulot seulemint s'soulager. Ch'soldat i a été l'arquère dins ches cabinets et l'a ram'né avec les aut' su l'route nationale.
Tous cheux qui étotent là ont espéré que ch'soldat allemand avot cru chelle femme et que ch'prisonner i a pas été puni.
