ech train d'plaigi - JMK
par klavzer jean marie le, 13/05/2006Hier, in ravisant ech ciel qui s'mettot al pleufe, ej pinso au train d'plaigi, ch'ti dins l'quel ej su monté pou aller vir la mer el première fos. A uit ans j'in parlo, sins l'avoèr jamais vue.
Un biau jour min père i a dit " diminche in va à Malo, aveuc ech foot-ball" . El mitant d'nou famile ale étot du voyache, sauf man , qui avot toudis unne bonne excuse pou rester à s' majon. In a tous pris ech train plaiji, ch'est comme cha qu'min père i disot.
Que voyache mes gints! Des cabats rimplis aveuc à minger pou l'carante tros ème, tartinnes au pâté, au gambon, au fromache , même des tartes au chuke; pépère i avot pris un vieux lille, i puot tellemint qu'in a été forché d'ouvrir ches ferniêtes, du cop j'a eu unne buque dins m'n'oeul. J'oublio el limonate au chitron et pous ches hommes d'el bière au lite.
Ej teno pos in plache jusqu'au momint ù mort eud troulle, j'oso mette mes piés dins l'iau, ej les raviso s'infoncer dins l'sape frèke, m'laissant catouiller par l'équeume. Incore achteur j'a dins m'tiête ech raffut des vagues eud cheule première fos. Pus d'troulle, rin qu'du plaiji jusqu'au momint d'arpartir.
A midi in a fait briquet comme ches mineurs, si ch'n'est qu' ches tartinnes is croquotte à causse du sape et qu'el limonate ale étot caute, mais cha sannot tellemint bon!
Ej voulo pus arpartir, du cop j'a uinnié tout l'voïache surtout qu'mes bras is comminchotte à piquer. Cha m'a pos impêché eud ténir min cabas rimpli d' coquillaches, pou rin au monte ej l'auro posé par tière.
Incore unne fos ch'est man qu'ale a eu l'dernier mot " mi j’ai pos b’son d’voyager, in met du sape plein l’majon, ches loques is sinte ech pichon, heureusemint qu'in tiot i m'a ram'né des coquillaches, pace que sin père i n'a même pos pinsé à ram'ner unne peugnie eud crevettes"