Les jardinsAdele , Annie DP
par annie62110 le, 02/06/2006Ch'jour la, j'nettoyo m'devanture quand j'ai vu quequ'cosse bouger su l'trottoir d'in face, j'ai vite compris qu'chéto eune hirondelle qu'al éto queute ed'sin nid. J'l'ai ramassée al n'avo pas peur mais al avo eune aile cassée, un voisin qui m'avo vu faire, y m'a proposé eune tiote cage pour pouvoir el garder, m'vla donc al maison avec el cage et l'tiote biete, j'y ai r'plaché s'n'aile l'long d'sin corps et j'y ai mis un tiot élastique autour d'elle mais l'pire cha va etre de l'nourrir, j'ai donc rameuté les gosses de ch' quartier pour attrapper des mouques, al mingeo bien chéto déja cha!! Un d'ché momes, y'm'demande "commin qu't'l'appelles", alors la!! j'leur propose ADELE cha leur plait.
Quand j'mets m'main din l'cage al monte tout duchemin al s'blottit et al s'indort, al aime aussi l'poche d'min tablier, al peut y rester eune heure sans bouger. Par contre impossible d'mettre l'cage al cour, ses copines al font un raffut pas possible quand al z'y rindent visite!!
J'l'ai gardée un tiot momin et pi un matin j'l'ai r'trouvée morte al avo fait eune hemorragie, al devo avoir in co a l'intérieur, j'ai mis ADELE din eune tiote boite, j'l'ai intérrée sous in pied d'pensées, à ché tiots j'ai dit qu'al eto r'partie avec ses copines, l'pire ché qui n'a qui l'ont vu voler!
Mi j'ai r'fermer l'cage, eune tiote porte d'min coeur, et tous les ans j'attins l'retour des zhirondelles, et l'floraison des pensées d'ADELE.
