la nouvelle coop
par minloute le, 14/06/2006ché là qui a eu un momint l' nouvelle coop , chéto eune révolution pour l' époque, bin ouais djà que l' coop chéto eune révolution, té pouvo trouver au même endroit du chuque, del charcuterie, des légueumes, des pates , du riz , du jambon al' découpe , d' zalleumettes
ouais cha peut paraite gnangnan , mais chéto djà eune révolution pasqu' avant sul' rue Anatole France à Bruay , t' avo des bouchers, des boulangers, des marchands d' légueumes, un magasin d' boissons, et là d' un coup té pouvo gagner un sacré temps en argroupant eune bonne partie d' tes zachats au même endroit , pi avec des prix attractifs , in tout cas bon rapport qualité prix
pi au début des années 70 i s' sont installés in bas del cote d' Labuissière, pas loin du quat' chemins
i avo formidape à l' époque , des caddies oh pas des grands vu qui avo pas cor grand monte qui preno s' carette pour faire ses courses, vous m' direz i zavotent te pas un grand parking aussi
in trouvo que cha avo perdu un peu d' son charme , d' l' ancienne coop du que té attindo tin tour , vu que t' éto servi d' derrière un grand comptoir et qu' au bout del ligne i avo l' caisse enregistreusse oh pas du dernier cri, cha couino, cha accoucho pour et' sortir un ticket, pi pas détaillé comme achteure mes gins i avo pas vraimint l' détal des zartiques , pas l' date ni l' nom del personne qui t' servo vu qu' ale coop enfin l' ancienne chéto toudis l' même qui éto al' caisse , ale m' impressionno in étant tchiot pasqu' ale avait del moustache, oh ale éto pu très jeune non pu faut dire
l' nouvelle coop chéto bin , i avo plus ed choix mais t' éto limité par l' taille d' tin chariot à roulettes , t' allo pas n' in rimplir deux fos l' contenu, pi un aut' défaut dech' magasin i éto in bas del cote, alors quand t' habito in haut i fallo s' coltiner l' cote au r'tour et chariot carké , chéto pas l' pu simpe
pi carrefour i a ouvert al' bussière, aprés ché cora qui a r'rpis l' plache et là cha a été l' début d' la fin pour ch' magasin, ché gins i zont pris l' habitute ed sortir in carette pi y fallo s' faire eune raison , quand qu' on a vu ché premières grandes surfaces in a été comme des gosses, i avo des produits partout, chéto spacieux, chéto convivial, alors bilan, l' nouvelle coop ale a t'nu bien moins l' choc in durée que l' ancienne coop ....
( 1 photos)