confiture ed framboises

j' vous a raconté dins l' sujet "framboises et groseilles" chés préparatifs et ch' cérémonial avant d'ete prêt à attaquer l' confiture, ben j' diros que l' plus gros du traval y étot fait et qu'après cha allot core assez vite, alors vlà c' que m' mémé Chérie ale m'a appris

Alors in a donc sin saladier plein d' framboises et qu' cha sint bon .., voir plusieurs, mais j' vous l' déconselle, faut pas in faire trop d'un coup, passequ'après i faut les cuire plus longtemps et cha va pas

chés framboises mi j' les mets dins eune cocotte, eune bassine à confiture si vous avez, et j' les fais cuire un tchiot peu, mais pas trop, que cha fasse un peu d' liquite
l' but ché qu'ales seuchent pus faciles à mouliner

Après i faut sortir s' pus belle moulinette à main, cha tout l' monte i dot core avoir cha, cha s' vind core in plastique, avant ales zétotent in fer
i faut mette l' grille qui va bien pour pas qu' chés pépins i passent, et in passe comme cha toutes chés framboises, au dessus d'un saladier pour récupérer ch' jus bien sur, in mouline bien pour pas in perte

Ch' jus arcueilli i faut l' mesurer et pour un litre d' jus in ajoute un kilo d' chuque, du chuque à confiture cha va très bien
Et in armets ch' jus et ch' chuque mélingés à cuire, et après in touille régulièr'mint et in survelle ( si ch' téléphone i sonne, i rappell'ront pus tard )
Et ché cha l' pus difficile à espliquer, ché un peu eune question d'habitute l' cuisson
i faut qu' cha bouillonne, un coup, pis in baisse un peu l' fu, in laisse un peu cuire et in arfait bouillonner
j' sais pas dire combien d' temps, mais pas plus d' eune douzaine d' minutes au total pour bien garder l' gout des framboises, si cha cuit trop cha n'a pus que l' gout d' chuque
ché pour cha qui faut pas in faire trop d'un coup (à peine plus d'un litre cha suffit) , vaut miux l' faire in plusieurs fos

TRES important, enfin pour mi, j' récupère l'écume qui s' forme au fur et à mesure avec eune écumoire et j' mets cha dins un bol, et j' vous dis pas l' lend'main au ptit déjeuner ... ché core meilleux que l' confiture ...

in vot quand ché cuit in in mettant un peu sur eune assiette, ou in plongeant l' cuillère in bos et en l'armontant si cha coule très lentement et qu' cha colle à l' cuillère

après in met in pots, qu'in a préparé avant chés pots, passés à l'iau claire, artournés mais pas essuyés

et in laisse comme cha, l' lendemain quand ché frod in peut mette el parafine pour boucher et ch' couvercle

l' pus dur in fait ch'est d'estimer si ch'est assez cuit
si jamais l' lend'main ale étot core liquite ben faut l'arcuire un tchiot peu

in fait in appelle cha del confiture mais ché plutôt del gelée pisqu'in garte que l' liquite d' chés framboises