l'certificat d'études, poème

L' CERTIFICAT D'ÉTUDES
poème de Jules Mousseron

Monsieur Louis, l' garchon Mamape,
I-est r'vénu d'Ecol' parmi nous.
Ch'est un ingénieur fort serviape,
Pou ses amis d' jeuness' surtout.

Ainsi, l'aut' jour, s'n ancienn' visenne,
L' rouss' Pélagi' du Carreau d' bos,
All' li d'mand' qué s' garchon, Ugène,
Fuche imployé dins un bureau

« Bonjour, M'sieur Louis, qu'ail' dit l' femme,
J' viens vous trouver pou min garchon,
Ugène... oui, ch'est cha... ch'ti là-même
Qu' vous avez berché dins l' coron...

Bé oui ! l' tiot roux !... Acout', queu conte !
Ch'ti qui mettot vos vieux gilets ! »
L'ingénieur voudrot bin réponte ;
Mais l' femme ail' dévide es caplet

« Oui, m' tiot Ugène, i va à l' fosse...
Mais, vous l' savez, i-est si langreux !
L' métier d' mineur est dur m’ gosse
Dins un bureau i s'rot bin mieux !

D'autant pus qu'i f'ra vot' n'affaire
Il est instruit, bon musicien...
M'sieur Louis, si vrai qué j'sus s' mère,
I fait l' maguett' dins s'n instrumint !

M'n Ugène i connot ses quat' rèques.
I-écrit à l'incr' comme au crayon.
A huit ans i d'allot à l' pêque.
I carcul' comme un maîtr'-porion.

L’ dessin su les palissartes
S' connot à l' heure mieux qu’ l'horloger.
Ibagu' les pigeons. Quand i partent,
Ch'est li qui les fait constater.

I-est l' premier champion du jeu d' boules,
Et tous l's ans, au Quatorz' Juillet,
Premier prix dé l' course à guernoulles,
Premier prix dé l' course à baudets.

I-est à tout' main, à tout's manières !
Il écrit bin mieux qué l' méd'cin !
Cha, cha vient d' sang ! S'n arsoulle ed père
Ch'est l' pus fort jueux d' piquet dé D'nain !

Allez, prénez m' garchon sans crainte
I connot l' pinpin t' qu'au turot.
Hein, M'sieur Louis, vous d'allez l' printe
Pou li récrit' su un bureau ? »

L' femme a bâclé cha tout d'eun' tire,
Comme eun' leçon, pou n' point s' tromper,
Et pindant qu' Pélagi' respire,
L'ingénieur peut tout d' mêm' parler

« Madam', j' vais m'occuper d'Ugène.
Je suis si content d' vous revoir
Vot' jeune homme est un phénomène,
D'après tout ç' que vous m' fait's savoir.

J' crois que j' pourrai l' caser, en somme,
Sitôt qu' l'occasion s' présent'ra...
Ah ! j'oubliais... Nom d'un bonhomme !
L' certificat d'étud's, il l'a ?

Iou-iou ! N'ayez point d'inquiétude !
Mais enfin, l'a-t-il obtenu ? –
Pfutt ! el certificat d'études !
I n'a foqu' cha qu'i n'a point eu ! »