Les jardinsEine pleuve particulière
par Ch'Zio le, 01/09/2006Dins nous dortoir d'ches s'condes, les lavabos et les toilettes étotent d'l'aute côté de ch'couloir et, pour i aller, in devot passer devant l'chambre du pion.
Ch'étot in terripe (vir l'article "Des marrons qui donnent faim") et in avot l'troulle d'être collés si in l'réveillot in passant.
Alors in a treuvé eine solution. Comme dins nous cours ed physique in venot d'apprinte el trajectoire parabolique d'un jet liquide sortant d'un ajutage, in l'a mis in application in ouvrant l'fernête ed nous boxe. Et comme in ch'temps là in n'avot pas d'problème d'prostate, in pouvot faire l'concours d'el plus belle parabole.
Mais, in jour, in intindit in bruit d'bottes caractéristique : eine patroulle allemande al passot in d'sous d'nous fernête, su l'trottoir d'el plache Clémenceau.
In l'a vite arfermée, in faijant l'moins d'potin possipe.
In r'chevant chelle pleuve particulière, les fridolins i s'ont du s'demander si ch'étot eine chauve souris ou in osiau déringé. In a eu d'el chance : si i s'étotent aperchu d'l'origine d'el pleuve, nous bêtise aurot pu nous coûter fort querre. Mais in n'pouvot pas prévoir qu'eine patroulle al passerot juste in d'sous d'nous, et juste à ch'momint là.
L'photo du collège d'Béthune d'puis l' plache Clémenceau, arprise ed Marie-Claire, moute l'affectation des bâtimints in 1941 : à droite l'école primaire supérieure, annexée ach' collège, et à gauche ches salles de cours d'ech'collège avec, au dernier étage, el dortoir des secondes avec ses fernêtes, lieux d'nous exploits.
( 1 photos)
