ché camions-commerces ed'Fouquières

J’a oublié d’parler, dins l’série commerces, d’ché camions qui venotent t’livrer à t’porte. J’pinse spécial’mint à ch’boulanger et à ch’laitier.

Dins m’rue, ch’boulanger qui livrot, ch’étot Hermant. I passot tous les jours de l’semaine sauf el’diminche, j’pinse. I stationnot s’camionnette près d’ché maisons, i klaxonnot et ché femmes (c’étot surtout ché femmes), al’allotent quer ch’pain pour l’journée (in mingeot plus ed’pain avant, j’cros bin). J’me souviens aussi qu’j’avos parfos drot à un tio pain au chocolat. Après l’départ d’ech boulanger, y avot toudis un’ paire ed’femmes qui in profitotent pour faire la causette su’ ch’trottoir !

Ch’étot l’même cosse pour ch’laitier. Li, j’sais pus sin nom ; j’cros qu’i v’not du Transvaal (pas d’l’Afrique du Sut mais du quartier d’Fouquières qu’in app’lot ch’Transvaal, à causse du nom d’el fosse qui s’y trouvot, j’pinse). J’em souviens surtout qu’i vindot, in plus du lait et du beurre, des yoghourts. Y avot des « Boum » au chocolat et aussi des yoghourts aux fruits dins des pots in carton : quand té t’régalos trop avec tin yoghourt, té finissos par râcler l’fond du pot et, à chaque cop, té raclos aussi l’chire qui protégeot l’intérieur d’ech’pot ! Berk, que l’cuillérée-là al’étot pas bonne !!!

Tous ché commerçants-là (boulanger, laitier,…), j’sais pas si y n’a incor’ qui passent’. I ont p’têt eu moins d’succès par la suite. Par exempe, in acatot ché produits laitiers au jour le jour pasqu’in avot pas tous un réfrigérateur à ch’t’époque-là (à l’maison, in en a eu un que dins les années 70 ; avant, in gardot tout dins s’garde-minger à l’caffe).
Avec l’apparition du réfrigérateur, in a pu stocker des produits frais pour pusieurs jours. L’boulanger a p’têt eu plus ed’chance pasqu’un n’avot point ker congeler du pain (j’ai toudis point ker cha, d’ailleurs) (et ch’est vrai que ché congélateurs, i sont incor’ apparus pu tard, j’pinse. In a du in avoir un dins ché années 80 chez mi).

Dernier camion-commerce dont j’me souviens aussi : un marchand ed’fruits et légumes. J’cros que ça s’app’lot « Au cours des halles ». Cha, ché pu tard, j’cros, p’têt à la fin des années 70, j’devos déjà pu êt’ à l’école à Fouquières.

J’me répète p’têt mais tout cha, cha créot un’ certaine convivialité ; ch’étot incor’ un’ façon d’mettre les gins in relation. Té veyos ché voisins et voisines. Achteure, té connos point toudis ché gins qui habitent dins t’rue…