l' service militaire (1)
par Hervé62155 le, 09/09/2006Un vaste sujet ed'discussion, l'service militaire... Mi, j'garde un bon souv'nir d'mes 12 mos à l'armée: cha m'a sorti de m'maison (ed'Fouquières!)et d'mes études.
Ch'est vrai que j'as eu d'la chance: in m'a inveyé inseigner dins un'école militaire, donc ch'étot spécial. Là-bos, j'a rincontré des gins de tous horizons, incor'plus que dins ché écoles que j'avos fréquentées, et pour mi, fils ed'mineur, cha a été un'bonne expérience.
In faisot des exercices militaires mais pas trop. Ché gradés, i étotent sympathiques, « cool » comme i disent ché jones achteure. Ed'plus, j'étos bin logé: j'avos de l'iau caude in permanence, j'avos accès à un'douche tous les jours (alors qu'à m'maison, in avot pas d'salle ed'bains; in s'lavot dins un baquet!)et à des cabinets à l'intérieur d'ech bâtimint (à m'maison, ché cabinets, i étotent incor' dins ch'gardin!). Pus d'vingt ans après, j'as incor' des contacts avec des gins rincontrés là-bos.
Mais ché vrai aussi que l'armée, ch'est pas pareil pour tout l'monde. J'em souviens d'un garçhon qui est arrivé in cours d'année dins l'caserne jouxtant ch'l'école: i arrivot d'un régiment d'u qu'in i avot fait tout vire! I'avot l'air d'un tiot oziau queu du nid: apparemmint, i'étot assez tiot ed'talle et i pouvot pas pu suiv' dins ché marches; alors ché gradés, i l'avotent traumatisé par leus remarques désagréapes. Au bout d'un momint, i'avot craqué et i a dû aller à l'infirmerie pour dépression. Là du qu'j'étos, i'étot v'nu arpeinte ch'el caserne pasque i'étot peinte dins la vie actife (l'Armée, al' étot pas gênée: al l'avot traumatisé mais al'trouvot incor' l'moyen d'l'exploiter!). Cha m'avot frappé de l'vire comme cha, ch'pauv'garçhon, et j'm'étos dit que l'service militaire, cha pouvot êt' dur pour certains... Pour mi, ch'étot pain béni, pour d'zaut', ch'étot pain noir et dur... Est-ce que ch'étot un'histoire ed'chance? un'histoire ed'caractère? J’avos pas eu un’vie toudis facile avant l’service militaire (selon ché critères d’achteure !) ; p’têt que j’étos pu rindurchi…