in haut de ch' terril 2
par minloute le, 19/10/2006vlà Arras , bon in va canger d' train,
pour mi Arras ché ptete l' préfecture du pas d' calais, mais ché pas ché nous, cha sint pas l' ouvrache ichi, té vo nin d' corons ...
in va quitter le lusque ou tout au moins ch' confort, in sort such' quai et in s' dépéche ed' traverser ch' tunnel sous ché voies pour armonter dinch' T E R
alors là , c' que j va dire ché jamais péjoratif, j' préviens d avinche
là dinch' T E R , té vo l' réalité del région, des gins qui voyachent in train pasqu i zont pas d' carette, souvint un coupe, cor jeunes, habillés avec des vet'mints bon marché , eune poussette, un tchiot qui brait , tro quat' grands sacs à provisions rimplis d' vet'mint, pi un aut' infant plus grand, pas plus prop' , avec es' teuteute qu ale a djà du querre eune paire ed fos à terre, qui court dins touch' compartimint mais qu' ché parints i ralent un tchiot peu mais qui bouchent te pas quand meme
dire qui sont malheureux , j os'rai pas l' dire, d' quel dro d' juger du bonheur des gins al' mote qui sont arloqués ?
y a aussi l étudiante, qu ale print ch' train, tout in révisant ses cours
y a aussi ch' jone militaire, in civil, crane presque rasé, sin grand sac kaki à ses cotés , prét à aller feumer eune cigarette dès que ch' train i s arrete
pi des coupes ed gins tout simpes qui accompanent quéqu un d' leu famille sul' quai d' la gare et qui va au pire à l aut' bout du départemint ,mais pour eux ché comme chi chéto l' bout du monde
pi y a des gins comme minloute qui dissent rin, qui ravissent qui observent et qui s arplongent déjà dins leu racines
là, ch' train i démarre , souvint i arcule meme d eune dizaine ed met' pi cha y est i est parti, et là té peut observer comme té veux l ' région , cha va moins vite