N’fais jamais courir tin quévau..., Ch Bruchet
par Marie-Claire le, 21/11/2006N’fais jamais courir tin quévau in montant si té veux qu’il saque longtemps
poésie de Charles Bruchet
Qu’il est just’e ch’dicton là quand on y réfléchit;
Surmint qu’ché pour les jonnes qu’il a été écrit.
Quand in n’est jamais mat’e, plein d’santé, sans parel,
L’devise d’aujourd’hui est un précieux consel.
J’vas cor m’coucher bien tard, d’min j’vas m’lever d’bonne heure,
I’faut qu’j’in mette un coup, j’veux finir ém’mason,
I faut qu’après min post’e j’arfasse au moins quatre heures,
J’voudros avant qui gèl’e, couler tout min béton.
Quitte à arprinte incore un peu sur sin sommel,
In n’brad’ra pas d’mortier, chà s’rot t’i’ qu’un’e truelle.
Tout ce qu’in s’est promis, in àa à cœur dé l’faire,
In a de l’volonté, in est fort, jeune et fier.
Quéqu’ fos après dîner in a sin cœur qui dort,
Faut pas s’laisser aller, l’traval i’ nous attind,
Allons armuons nous, encore un p’tit effort,
Quand in veut arriver, faut lutter contre l’vint.
Tant que l’machine all’e saque in l’fait tirer à fond,
In va pas l’arrêter pour sogner un ptit rhume,
Un grog et d’l’asprin’e chà l’armettra d’aplomb,
Et chaqu’ jour sournois’mint, nou santé all’e s’consume.
L’quévau qui est si fort et qui cueurre in montant,
N’va pas d’un train parel saquer incor’e longtemps ;
Quéquequ’fos in r’déchindant d’l’aute côté du talus
Chà déval’e tell’mint vit’e, qu’les freins ne répond’ent plus.