in pose sin sac deux mineutes

d' temps in temps comme cha , faut poser sin sac deux mineutes , pour printe un peu d' arcule, pas toudis avoir l' tiete dins l' guidon, raviser , printe l' temps d' raviser , d' acouter

j' cro, enfin meme j ' su sur, si teut' laisse faire par la vie , té s'ra toudis al' presse , toudis in r'tard d'un truc à acater (combien d' fos qu in vo ou qu in intind dins ché publicités "nouveau", comme chi l' fait que ché nouveau té obligé d' l acater ......et que tout c' que t a acaté avant meme si ché récent ché pu d actualités et qui faut ABSOLUMINT L ACATER SINAN TE PEUT PAS VIFFE)

mi j' le dis souvint et j' su sur que vous l' dites so à vos infants ou vos p'tits infants "mais commint vous feriez si zavez pas ché portapes ?"
question aussi qu in peut s'poser à nous "commint qu on a pu viffe sans portapes durant tant d' sièques et qu achteure ché jones i leur faudro chinq forfaits mensuels pour finir l' mo si teu les zacouto .......................

in est toudis al' presse, al' presse pour gagner quo ? du temps lipe pour acater des chosses ou pour raviser l' télé, ché c'que m'file d' 7 ans ale m a répondu quand j y a posé l' question et cor ale a bin busié avant d' réponte ....

ché pour cha que les vagances ché bien, pasque normal'mint in va printe in tchiot peu plus d' temps pour nous, meme si savez , ché commerçants i sont là près à nous tenter pour qu in acate au minimum un souv'nir du coin, eune bricole qu on dit , ou qu in fasse faire un tour ed poney à ché gosses, ou visiter un parc d attractions.....

achteure mi j' sais pon commint qui font ché gins des classes moyennes qui ont plusieurs infants, quant té vo c' que cha coute, l' mointe musée et j' dis cor un musée pasque ché cor éducatif, té multiplie cha par l' nompe d infants bin cha comminche à buquer, sans parler des dépenses tout autour comme eune glache, un coup dins zin bistrot bin cha comminche à douiller ......

et j in parlo avec des zamis qui partent in vagances du coté del' méditerranée, i dissent qui zont cangés leu habitutes d' vagances

l' année derniere i zont comminché à rogner su les zactivités pour ché jones, ah faut dire qui les zavotent habitué à piscine régulier'mint, tennis, sorties in mer

ouais i zadorent comme i dissent faire plaiji à leu zinfants , à eux aussi bin sur , mais l année derniere i zont comminchés à réduire la voilure comme in dit, moins d' activités ou plutot i zétotent persuadés del faire, mais d'vant ché zinfants qui comprennottent te pas, bin ouais si te leur explique pas avant d' partir que té va faire moins d activités pasque tin budget i est plus serré, té peux inventer eune aut' escusse cha passe pas, et meme si t avo pas prévu d arfaire ché zactivités te les fait quand meme

tout cha pasque t ose pas avouer à tes zinfants que tin budget i est plus serré, t as peur ed passer pour un babache
mi j a eu du maux j' me souviens infant quand que m' mère ou min père i m' disottent cha in peut pas l acater , meme si in allo in vagances un peu loin en france, d un aut' coté cha réduiso aussi l' budget à dépenser du qu on éto en vagances

alors quo qui ont fait nos zamis ch' tannée ? bin au lieu d' partir 15 jours i sont partis 10 jours ....tout cha pour que leu budget i explosse pas ch' t année, pasque l ' année derniere leu compte i a arvénu au vert courant octope ......

nous par ichi in béarn, l' mo d' juillet in a pas vu grinmint d'touristes , à part marie claire et frette bin sur, mais meme avec eux in a pas été débordé in visitant ché villaches, in avo plutot l impression qu' ché gins i zétotent contints d' nous vire, in tout cas i zavottent du temps pour discuter avec nous, preuffe que ché touristes i n avo pas des masses
au mois d aout cha a été un peu mieux mais ché quand meme pas terripe, j' voudro bin savoir l' tendance au final pour ché vagances, j a peur que cha vienne cor alimenter l'idée que ch' pouvoir d achat i arrete pas d' déchinte

faut dire aussi , meme si ché la vérité, que si vous ravisez l' journal d' 13 heures avec jean pierre pernod, à chaque coup in vous parle del' perte du pouvoir d achat, et là j' su sur qu à forche ed faire d' la marteauthérapie, ouais ché un mot à minloute cha, la marteauthérapie , ché quand té fait rintrer eune idée dins l'tiete à quéqu un in arrétant pas d' li in parler, in arretant pas d' li répéter, del' seriner , bin là toute la france ale sait qu in perd du pouvoir d achat
dur à avaler cha mes gins hein, comme devoir travailler plus longtimps sans avoir eune meilleure artraite

mi, né en 1960 ,aprés les années "glorieusses" d aprés guerre, j' dis "glorieusses" pour l' nompe d infants qui sont nés, pasqu au début ché conditions d' vie chéto nin facile , bin j' me dis que pour avoir eune retraite correque i va falloir cravacher et cor ........

et que dire pour nos zinfants

mais arvenons à l' essence meme du sujet " in pose sin sac deux mineutes"
ravisez au matin quand que vous ouvrez l' farniete ou l' porte , zavez armarqué qui fait plus frod ? que certaines fleurs comme la spirée par exempe , elle qui a fleuri d'puis un bon momint, là ale a arrété, as' concentre sur eune derniere croissance avant d' commincher à s' préparer pour l hiver ...

in dit souvint ah eune fo passé l' 15 aout, ch' temps ché pu cha, faut dire que t année les aoutiens et meme les juilletistes in règue générale i zont pas été gatés ... in est beaucoup à avoir eu del pleuffe, in n a pas intindu grinmint d' départemints mis in alerte sécheresse .....sauf bien sur du coté d' la provence bin sur

l'15 aout est passé, vite in va canger les zaffiches publicitaires, in va tout miser sul' rentrée des classes meme si cha a djà comminché vers fin juillet, date à laquelle nous in a archu l' premiere publicité pour ché fournitures ..........

pour cha j' me dis dins l'pessimisse ambiant , meme si y est d actualité ch' pessimisse là, faut printe son temps , allez , ché à la portée d' tout l' monte , prenez djà l' temps tous les jours d' aller raviser vos fleurs dinch' gardin, j' dis pas del' faire à toute vitesse, nan prenez l'temps d'raviser si y a pas eune branque à couper, eune aute à arpiquer, un brin d herpe à artirer, verrez , après in comminche à printe naturell'mint du' r'cul dins la vie