m' grand tante

M' grand tante ale éto espéciale, l' moins qu'on puisse dire , ale éto "distante" avec ché jones

In devro dire qu'in li éto indifférents,.....

Ale nous adresso jamais la parole, in éto pas des zadultes, in faijo partie du décor .......

Après pour ché dringuelles , ale éto généreusse y a pas à dire , chéto un gros billet

J'a un souvenir d'elle, oh j' devo pas avoir plus d' six sept ans , et chéto un jur d' Noël ou d' nouvel an .....

Sur pasque y avo qu' ché jurs là qu ale sorto s' belle rhabillure

Oh cha veut pas dire qu'ale metto des loques l' reste d' l année , sur'mint pas ...

Nan mais à la Noël et à la nouvel année , ale sorto s' plus belle rope, et surtout sin plus bio mantio

Chéto pas un mantio comme ez'zautes ..... cha devo et' en poil d' zibeline ou aut' cosse , in tout cas chéto pas du synthétique

L'pire pour mi chéto que j' devo imbrasser l' tante Marie, yavo tout qui m'effrayo .....

D'abord sin mantio, ch' tour du cou cha devo et' du r'nard ou quéquosse comme cha, savez chéto comme si in avo vidé l' biete , et cousu autour d' l encolure du mantiau

Alors l' tante as' baisso vers ti, t'éto aux premières loges, té croyo que ch' tanimal y allo s' réveiller et t' morte at' bouque ..

Ouais yavo cor ses dints, (j 'parle du renard) pitit j' em demindo si i faijo pas simplement semblant d' dormir ..
bon , j' preno sur mi,...

Après t'avo dro aux zéffluves d' sin parfum, ah vinguette , té teut'd' mindo si chéto pas à base de flytoxe

Comme dijo m' mère qui essayo d arrondir ché zangles " ch'est prenant " ...

Min père i dijo que chéto tel'mint fort que si yvo eu des mouques dins' l' pièche as'rotent qué à terre

Après ch' parfum, dernière épreuve , fallo l'imbrasser ..

Mon diu, mi tout jone, devoir poser m' bouque sur s'piau toute frippée, arcouverte d' poud' d' riz ...

Sur que si t'avo eune chiffernée, après t' avo tin nez d' débouché .....

Alors "ma tante" , si vous lisez cha asteure , pététe que serez pas trop continte...

Mais voyez , près d' 50 ans après que zetes partie, y a cor quéqu'un qui pense à vous ......