coup de blues

Hier en ar'vénant ed lille, pour arjointe la côte, j'ai passé sur el rocade minière. Y fajo nuit, y'o 23h30. Y neijot un tiot peu. Ché à ch' momint là qu'jai vu ché terrils jumeaux d'haillicourt et ché là qu'jai eu un coup d'bourdon comm in dit. Jéto tout seul et j'sus allé à Bruay. Ch'voulo aller din m'ville. Tout seu. Inne sorte ed pélérinache. J'su passé din min ancien Fief au n° 3. J'me su garé sur el parking d'el cimetière et j'su rintré in communion avec em m'mère qu'é interré là. Après j'ai fait un tour à la gare, l'CES, l'rue Verte, l'maternité. Ch'su passé din les rues d'mes anciens cafés, les cinémas. Que de souvenirs mes gins qui m'sont ar'vénus. Y'avo personne din ché rues. Avant d'ar partir ech me suis arrêté sur el plache marmottan et j'ai ravisé l'églisse Saint Martin. Et pi j'ai quitté Bruay pour ar'venir al maison.
J'ai pinsé à gramin d'monde pendant min tour à Bruay. A m'famile bin sur, et mes anciens copains d'jeunesse à ché disparus. In n'pinsée aussi à ch'site et à tous ceusses qui racontent leurs histoires, Daniel POQUET in particulier, Minloute, Nounours et les autres.
Ch'su pas dépressif, ch'su pas nostalgique à outrance mais j'peux vous dire mes gins qu'hier soir Boxerman in n'a pris un sacré coup din sin coeur. Ch'sur arparti heureux, conscient qu'ej vénot d'faire un sacrée thérapie pour em conscience.

ché "l'drame" d' nouzautes qu in a quitté eune ville et eune région qu on éto cor jone, et quand qu on y arvient , in voudro secret'mint arvire ché cosses comme ale zétotent avant .....

ché surtout del nostalgie pour not' infance, et faut dire qui a pu grand cosse pour nous raccrocher aux branques ed' not' infance ..............

pu grinmint , voir pu d' famile cor ichi, alors qu in a connu des ribambelles d' gosses, qu in a participé à des r'pas du que ché tablées ale zobligeotent presque à arpousser ché murs tel' mint qu on éto nombreux
.................... cha fait "drole" d' s artrouver ichi sans point d ancrage, sans indrot du qu té peux ouvrer l' porte qu in t accueule et qu' té peux poser l' veste au porte mantiau

pi eune vile qu ale a évoluée, tant bien que mal, elle qui s a developpé pour et par l' carbon , que tout gravito autour des chevalets, des dechintes, des postes, et des sirenes l' midi ................

quand tout cha disparait, ché sur qu in y r'trouffe pu l animation dins ché rues, ché commerces sont presque tous freumés, des rues intieres d' coron sont abattues

et faut pas avoir peur del' dire , l'esprit dins ché corons i cange, et pas en bien .................

rin que sur Bruay , ch' montant des dégradations faites par des jones désoeuvrés ché impressionnant ............

donc tous les ingrédients sont là pour que nous, qui étions natifs d ichi, in s' sinte d' plus en plus étranger à la ville et cha cha fait du maux à sin coeur

Mi qui a toudi resté à Bruay ech' comprint votre nostalgie ed vous coins ed jeunesse, mi quand ej vais au 3, aussi bien au 4 et au 6, i manque un bruit qui s'faisot constamment aussi bien el jour qel nuit, ché el bruits ed ché compresseurs pour l'air comprimé du fond. On intindot el fameux bruit ed chez piston. Les gins qui restottent à côté ed ché fosses, y n'y pinsottent même pu, comme mi, mais el diminche matin quand ej faisot en tour dinl' gardin chéto silence complet, seul là t'armarquo qui manquo quit' coss'.
Mais vous ots' camarates qui sont partis parfois au loin, in pinse à vous.
Cha vou étonne pas que certaines personnes d'un certain âge qui ont quitté leu région y arrif' un momint y armontent