ché tchiens

té cro qui est là ?
acoute j in su sur, j' su passé d'vant taleure et j' l a intindu....
j'éto avec min camarate Philippe , chéto l époque du que l' mercredi après midi, in s amuso à tirer ché sonnettes, ou à explorer autour d' not' quartier ....

quand que j' dijo "explorer" chéto s' artrouver à l aut' bout dech bos d' labuissiere, ou in bas du ch'min des hayettes à labuissiere, pour s artrouver sul' route qui conduit asteure vers Emmaus ....

ché pas qu in traino dins ché rues , ché qu'in parto explorer, cha pouvo aussi rintrer dins ché masons abandonnées comme qui avo in haut del rue d' Montataire, ou au miyeu del rue d' Isbergues

chéto au temps du qu in metto pas cor des griles partout pour impécher les dégradations, et si yavo dégradations d' not' part , chéto pas des squats ni pour printe eune cuite, chéto pour aiguiser not' curiosité ....faire monter l adrénaline, in montant à l étache sans s' faire arpérer par ché vigins, casser tro quat ' carreaux in partant , avant d' s égayer dins les rues attenantes ......


in avo un jeu, bon i valo c' qui valo, mais in y juo au moins eune fois par semaine

in allo rue d' isbergues et là , in avo arpéré, pasque Philippe i devo avoir sin mononque pi s' matante qui habito dins l' rue, in avo arpéré que quand qu in passo d'vant eune mason, in intindo ch' tchien qui gueulo derriere l' porte qui donno sul' courette comme un malate.....

j a jamais su l' race que chéto, à d'viner pour mi cha devo et' eune espéce d' loulou blanc à longs poils...

chéto un malin et d' ailleurs chéto cha l' jeu, dés qu' té passo such' trottoir, i s' metto à gueuler, à passer l' bout d' sin musiau et d' ses dints in d' sous del porte pour attraper tout c' qui pourro dépasser àch' momint là .....

l' but du jeu que j avo avec min camarate philippe, chéto d' passer sans faire d' bruit such' trottoir et d aller l' plus près possipe del porte in bo del courette, dinch' rinfonch'mint entre ché deux masons sans que ch' tchien i aboye , avec l idée d 'pouvoir toucher l' porte sans qui nous arpère ...

in a jamais réussi, i nous za toudis arpérés, meme si y a des coups in a réussi à s approcher bin pres del fameuse porte , mais i nous zarpéro toudis ...

in insisto pas, pasque à faire aboyer ch' tchien trop souvint , sin mait' i s' ro sorti, et si in avo jamais vu l' tiete dech' tchien, in connaisso celle d' sin maite , et cha avo pas l' air d' ete un grand rigolo chtilale ........

d' ailleurs ché tchiens dins ché corons,quand que t y pinse, soit chéto un tchien à sa mémère , soit i éto attaché dins l' cour , yavo pas grinmint d alternatives......
d' abord pasque in cultivo ché gardins, et qu in auro pas toléré d'vire ch' tchien au milieu des cultures, pi chéto cor eune époque du qu un tchien, attaché à eune laisse , elle meme fixée à eune niche , cha geno pas

faut met' quand meme un bémol, mi j' me souviens rue raymond deruy, yavo un viu qui cultivo sin gardin , bin ch' tchien i savo qui pouvo s' prom'ner dins l allée, que dans l allée qui allo del mason à l' porte d' intrée qui donno su la route
j me souviens qui s' arposo , allongé dans l allée, tandis qu' sin maite , i éto à crou crou entre ché routes d' légueumes à tirer des fichelles pour ché prochaines plantations .....

par conte j a des souv'nirs d' intrer dans des cours du que ch' tchien i éto toudis such' béton del courrée, bin vinguette, l' pisse ale s éto imprégnée dins l' béton et quand qui faijo caud, cha sinto vraimint très fort

j' dis pas que ch'tien i éto malheureux , mais chéto sin sort d ete attaché dehors et dormir dins ' niche

à l opposé yavo aussi ché tchiens qui eux déchindotent à peine des g'noux d' ché grands mères, à peine pour s' déplacher dins leu paniers .........

souvint des tchiots tchiens , type roquet, qui fallo toudis s' méfier quand té rintro ché ché gins, meme si l' matante ale dijo, "y est pas méchant" ...

bin ouais matante ché pas ti qui va morte par derriere comme cha , pi que juste aprés t avoir mordu , i pousse un cri , comme si t avo eu l' temps del taper et que s' maitresse ale va plus s occuper d' c' qui a pu arriver à sin tchien qu à tin mollet .........

ch' tien i mingeo pas grinmint d' boite, in leu donno du riz , avec souvint les restes du repas ...

bon ché vrai qu au momint d' printe ch' café, ch' tchien i éto à l affut, pret as' mette su ché pattes d' derriere, pret à faire ch' beau, tout cha pour que sin maite ou s' maitresse ale so continte et qu ale li donne sin morciau d' chuque ...

in a tous des souv'nirs d' tchiens al' mason, j' su sur mes gins ...

en voiture Simone , j'ai pu trop souv'nir de s'que cha veut dire l'expression. mais j'in conno un qui in a treuvé eune:
en voiture codi