la framassie mutualisse

après min périple in haut , au quartier du 3, j' su arparti vers la Porte Nord, toudis à pied , et j' a passé par la rue Jules Marmottan

j' voulo essayer d'arperer du qui yavo la framassie mutualisse

l' rue Marmottan chéto pas eune rue que j' allo souvint ,au pire meme plus tard, chéto plutot pour mi eune rue d' passache avec pas mal d' circulation , qui permetto d' arjointe rapid'mint les quat' chemins in évitant d' passer par la rue d' la République ,l' rue Charles Marlard, l' cote des grands bureaux etc .....

souvint la veille mes parints i discutotent, "alors d' main té pourro faire chi ou cha" et là min père i raviso m' mère d' un air in li dijant " d'main matin j' va al' framassie mutualisse"

cha voulo tout dire .... ché sur qu in payo pas ché soins et ché médicamints, mais fallo savoir s armer d' patience, entre l' visite ach' dispensaire, pi aprés, aller querre ché médicamints

d' ailleurs chéto général'mint quéqu un d' aute qui y allo, sinan pour ch' malate chéto un coup à y laisser eune partie des' santé, et chéto pas l' but archerché

min père i li allo pour des vigins, ou des personnes du syndicat qui vivotent seules ou qui zavotent personne pour y aller ch' coup chi

mi j' a un très vague souvenir del framassie mutualisse qu ale éto dins ch'te rue, j a l impression que chéto dins l' prolong'mint des masons, qui fallo monter des marches qu ale m' paraissotent hautes

in plus , parel ché qu un vague souvenir, j pinse que l' soubas'mint du batimint y éto d' couleur noire , chéto pas d 'eune grante gaité

in monto des marches, yavo d' grantes vitrines tout l' long, et des comptoirs à l interieur qui m' paraissotent très hauts

pi savez chéto délicat d' savoir dans quelle file d' attinte i fallo s' placher, j' vous parle d' la fin des années 60 , du que yavo cor un sacré paquet d' gins qui étotent prisses in charche par les zouillères

ouais chéto pas évident des' placher dans la bonne file, un peu comme al' poste du que l' personne d'vant vous ale a fini ses opérations avec un premier carnet, vous vous pinsez que ché à vot' tour, et ché là qu ale arsort un second carnet avec eune procuration pour régler d' zaffaires qui concernent eune voisine

al' framassie, chéto parel, té faijo la queue et l' personne d'vant ti , et chéto cor assez fréquent ale veno avec 2 voir 3 carnets d' santé ..........

alors quand que min père i li parto in savo jamais à quelle heure i allo in rintrer, y a des coups chéto rapite, la chance , pas grand monte

in l a vu aussi arvenir rapid'mint, m'mère ale éto djà continte, mais in fait chéto tel'mint plein qui avo fait demi tour et qui allo y artourner avec l' carette en miyeu d aprés midi, avant d aller as' permanence place Marmottan

alors j' vous a mis des photos del rue Marmottan, j' me d'minte si chéto pas al' plache de chte grand magasin d' alimentation, ou un peu plus loin

j' sais que chéto tin quartier, Sopraniste d' Bruay, et qu' té pourras éclairer not' lanterne

merci d avinche

j' vous a mis aussi eune photo d' la rue Marmottan, mais j' cro meme que Sopraniste i éto pas né ach' momint là ...........

à raviser l' daine, chéto du temps que Bruay mérito sin surnom de "Bruay les berdoules" ....

Si mes souv'nirs sont bons j'pinse que l'pharmacie mutualiste alle étot là dû qu'j'ai mis l'flèche.
Ch'est vrai qu'chés comptoirs is étotent vachemint hauts.

Ouais ché bin là du qu'ta mi el flèche.
Chéto juste in face ed l'épicerie TILLETTE et dech café.
Asteur j'auro voulu égalemint un peu d'recherches sur ché 2 magasins de m. Paul Chalmin. Minloute y'a bin mis in n'photo d'ech ti lal avec el rue d'divion mais pour ché 2 autes rien. Marie Claire al a bin mi in lien mais qui m'donne pas el réponse que j'attinds. Donc j'attinds.. Comme el tarte, passe que l'tarte tatin...

si mes souvenirs sont bons, in avot "un carnet" pour aller querre ché médicamints.

In pouvant déposer sin carnet d'in z'in ne boite et après ar'passer al pharmacie pour printe ses médicamints.

j'mé rappelle pu commint qu'in fajot mais j'cros qu'chéto comme cha.

ale éto assez rustique si mes souv'nirs sont bon, tout i éto un bos.

ché bancs,ch' comptoir,les étagères.

quand ej i allo avec des copains et que l' boîte ale éto pleine ej m'inringeo avec leur complicié pour glicher ch' carnet in d' sous d'ché trois ou quate premiers.

s'qui éto réciproque.

Bonjour à tertouss',comme el' bonne réponse al a été donnée ,j'el confirme, ché bien du qu'ya el flêche.
Sul photo, intre el voiture blanque et noire,chéto el maison Toursel l'assureur, après y est parti rue de la République.

Avant el pharmacie, chéto l'intrée d'en' cour, du qu'y avo grand mère à bonbons, qu'al qu'al les vindo à ché sortie ed messe à St Martin
à côté, chéto el logemint del famille du maréchal ferrant, ess' atelier y éto sul bord del rue.
Ess' fil' ainée al reste cor dinl' cour, ess' soeur cadette al éto mariée avec el' garchon Tillette... del pétite épicerie in face del pharmacie, j'em' rappele que ché Tillette y étotent pas fort agréap'....

Mais cor beaucoup avant el phamarcie, el viu batimint chéto el rendez vous des Âmes Vaillantes dont s'occupottent les soeurs St Vincent de Paul ed' l'Hopital Ste Barpe, in l'occurence, Soeur Marie Catherine, Soeur Marthe, ect.... Mi j'éto dinl' les Coeur Vaillants, dont s'occupo l'abbé Damiens, et les frères Beillard.

Toucha ché din les années 1947, y a des lustres mes gins, ej' dit bien y a des lustres... chéto min coin, car j'allo à l'école Jules Ferry du que j'ai passé min CEP in 1949.....

J'ai même vu ché allemands pendant la guerre, in 1943, baillonette au canon, dinl' rue Marmottan, et y disotent "Raoust'", et comme mi qui resto dinl' rue ed Béthune, ej' traino pas...
Ché des viu souvenirs ,mais cha reste marqué.....
Ach' vepp'