odeurs du passé
par minloute le, 03/12/2011in réseume souvint ché souv'nirs par des imaches
mais si j' devo sélectionner 15 odeurs d' em' n'infance , comme dans un bric à brac ........15 odeurs que, misses bout à bout cha pourro commincher à arsembler au début d un patchwork , eune espéce d' trame invisipe
comme cha, dans l' désorde
j' comminchero par l' odeur dech' terril qu in sinto dins tout bruay quand qui yavo du brouillard , cha ch est bin eune odeur caractéristique à not' région
l' deuxieme ch' s'ro l' odeur del biere et l' odeur d' finquée d' cigarettes qu' in s' prenno dins les nifflettes quand qu in passo d' vant la porte dech' bistrot et qu ale s' ouvro brusquemint , l'temps d'permette à un habitué à rintrer à l' intérieur
l' troisième ch est l' odeur des barraques à frites, eh mémé cha sint bon ...té rigole ti, l' huile ché fait avec del queue d' bidet .....(ché c' qu ale dijo m' grand mère)
l' quatrième, ché l' odeur des cendres quand que min père i récupéro ch' bac qui éto in bas du fourneau pour aller l'vider dinch' gardin
l' chinquième, chéto l'odeur , j'cro que cha s appelo la zébraline, ch' produit qu in metto su ché plaques du fourneau
le sixième, l' odeur si entétante d'l' éther , tchiote boutele avec un liquite transparent ed'dins
l' septième, l'odeur du café qu in v'no d' moude au matin avec ch' fameux moulin manuel
l' huitième, l 'io d' cologne et ché sent bon ........
l' neuvieme , l'odeur d eune espece de bande d' gaze verte qu in trouvo dans eune boite in fer, que m'mère ale découpo et qu in metto sul' pio quand qu in s éto brulé
l' dixième, l' odeur dech' sauret qu' min père i faijo arcuire sur eune grille au d' sus du fourneau
onzième, l' odeur pas toudis ragoutante d' ché caniveaux l été quand qu in s'prom'no dins ché corons
douzième, l' odeur dech' sapin quand qu in s in approcho pour mette ou pour raviser ché boules d' plus près
l' treizième, ché l odeur du cirache Kiwi, que m'mère ale metto régulièr'mint su ché godasses, yavo aussi du Baranne
l' quatorzième, chéto escusez me, mais l'odeur quand que t avo ch' camion à brin qui v'no dint' rue pour vider ché cabinets
l' quinzième, ché l odeur des savonnettes Camay, Cadum,Lux ou Dop ..
j' avo dit 15 odeurs, et j' vo qui n a toudis qui m arviennent comme cha, l' liste ale pourro et' infinie...
j' peux pon n' pas terminer su eune odeur caractéristique, eune odeur que chéto pour mi comme un artour en arrière à chaque coup
quand que j armonto avec m' femme et ché zinfants à mon d' mes parints, quand qu in avo frod rin qu in sortant del carette , arriver al' mason, pousser ch'portail del tchiote cour, yavo qu à raviser ché carreaux tout imbuées qu in savo djà...
té rintro dins l' sas, t' ouvro l' porte et là, teut' prenno 20 degrés d' plus que dehors au moins, in s' prenno à la fois chte bouffée d' caleur, pi tout in meme temps chte fameusse odeur, l' odeur dech bouillon qui comme préciso m' mère à chaque coup " y est in route d'puis 8 heures au matin" .......
mon diu mes gins, tous ché légueumes avotent abandonnés toute resistance, aprés 4 heures d' cuisson, d'écrémache, d'baisse d' fu, d' mijotache............
mon diu que malheur, l' odeur dech' pot au feu d' Manman............
Ej sus mis aussi très sensipe aux odeurs et les odeurs ont eune plache importante dins mes souvenirs, par momint in les ressent comme si in y étot core
Quand j'pinse aux lieux d'em n'enfance j'arsins core les odeurs associées comme si j'y étos core et ch'est comme si les odeurs étotent core bien réelles
Ch'est important passeque ché un peu comme si cha donnot del vie aux souvenirs, des lieux, des événemints, et pourquoi pas des personnes
A tes odeurs j'ajouteros l'odeur del baraque à bos, dins l'fond del tiote buanderie dins l'cour y avot eune tout tiote baraque à bos dù que min père i coupot du bos, el bos qui étot livré avec el carbon, et quand i étot in train ou qui vénot d'couper y avot eune très forte odeur concentrée dins l'tiot réduit, odeur que j'avos ker
Y avot aussi l'odeur del mason d'em grand mère, cha jé n'sauros pas l'décrire, chétot eune odeur qui m'plaijot et à chaque fos que j'arrivos, j'auros pu rintrer les yux fermés j'savos que chétot s'mason
Y avot l'odeur des garde-ropes et l'odeur surtout des "boules à mites" qu'in mettot gramin à l'époque, in y mettot d'ailleurs el sachet complet ouvert dins l'bas d'l'armoire
L'odeur del lessife qui séquot sur chés fils à l'intérieur del mason l'hiver
L'odeur du poèle à carbon tout simplemint
L'odeur ed l'école (primaire) et d'tout c'qui est associé, les cahiers, les liffes, les pupites in bos, l'encre et el cire ...
Et y a eune odeur que j'peux core sintir régulièremint et que j'adore cha, os allez m'treuver un peu bizarre, mais quand j'étos à la campagne à Enquin les mines y avot gramin d'fermes et dins les fermes dins l'cour y a souvint des odeurs un peu fortes ... ch'est pas el tiot tas d'fumier des masons... et à certaines périotes ed l'année ch'est des odeurs très très fortes, et cha associé à l'odeur des étapes à vaques et cochons, ben mi j'a ker passer devant eune ferme et sintir tout cha , cha sint la campagne comme dijot em marraine
Et très important l'odeur ed min papa et d'ses bleus d'traval quand i rintrot du traval
Y a gramin d'autes odeurs qui sont associées à nos souvenirs mais ché vrai que certaines marquent plus que d'autes
mi, ché l'odeur ed ché épluchures ed pétotes qui cuisotent l'aprés midi pour ché lapins et ché canards.
par chtitalienne le, 03/12/2011ej m'a arsouvnu ed l'odeur ed ché "bacs à chénes" faits in briques rouches qu'iavot din ché rues , ché ménagères al y jetottent ché ordures in vrac , in passot à coté in bouchant nott nez mi pis m'copine Michéle ,sur le chemin de l 'école in n'in crosot 3 .
par maurice devos le, 03/12/2011bin j'pinsos rajouter au moins in tiote odeur , mais j'cros qu'tout ya été dit , mai y n'da suremint cor , cache bin minloute et marie claire té vas trouver cha té cros pas
par MINLOUTE le, 03/12/2011oh que si in' na cor des zodeurs, tiens rin que l' sac à cabats d' Clara avec l' odeur des pommes
le steack qui cuiso avec ed l ' ail et qu' té sinto in passant d'vant ché masons
l' odeur des pomm'tieres au four qui cuisotent ............
et ché à l infini ....................
mi chétot des odeurs d'églisse, les cierches, ch'curé i guetto quand eune personne metto in cierche et i allot l'éteinte si l'personne al s'in allot aussitot.
et pis l'encens tous chés morts que j'ai encencés, fallot pas mette beaucoup d'encens cha coutot cher. tout absolumint tout se rapporto à l'argent qui avot aussi s'n'odeur.
aller à l'quinzaine et vire tous chés tas d'billets d'banque d'1m de haut d'vant ti et n'avoir in tiot peu. l'odeur d'chés billets tout cha chés des souvenirs qu'in ne peut pas raconter . in dit que chés vieux i n'parlent pas beaucoup pour quoi dire ché pas racontape
Dins les odeurs d'églisse y avot celles du jour des rameaux, tertous in arrivot avec note bouquet ed buis, que souvint in n'avot un pied dins l'gardin et in coupot des branques pour ech'jour là
Alors à l'messe des rameaux y avot eune très forte odeur ed buis dins l'églisse, mi j'a ker ch't'odeur
i a einne odeur que vous n'avez pas oubliée, mais j'ai ateindu que tous i finissent ed minger pour in r'parler. Quand i neigeo un p'tit peu in hiver ...ed fin novembre à début avril, in allo à l'école avec nos bottes in caoutchouc même pas molletonnéesz, et on devo laisser einne paire ed pantouffles à l'école, pour pouvoir inlever nos bottes... Cha ié ...tout l'monde isse rappelle ed l'odeur quand tout l'monde ia r'tiro ses bottes, et que ché bonnes cochettes en pure laine, un tio peu humides, i laissotent diffuser leurs délicates effluves ed bélier in rut. Que since din ché classes!!!! Mais finalement personne i n'est mort asphyxié