dans l' barraque au charbon

in l appelo toudis comme cha, meme si y avo fort longtimps qui yavo pas eu d' carbon d' dins, mi j' l a pas connu d ailleurs

par conte à coté chéto l' barraque au bois, cha j' m in souviens cor, j in avo fait un bio sujet y a djà un bon momint

dans l' barraque au charbon, ché là qu' min père i avo ses outils

fallo pas cacher d' outillache électrique, savez d'jà qu' min père chéto pas un grand bricoleur, mais qu en plus dans les années 70 chéto hors de prix

mi j avo ker bricoler avec ses outils meme si y me l interdiso, mais j avo ker couper des morciaux d' bos du genre 27x27 savez ché lattes qui servent à t'nir la toiture

j avo querre coincher un bout d' bo dans l' étau qui éto fixé sur un viel établi, printe eune scie couper (pas toudis bin dro, j' do dire souvint pas bin dro) ché bouts d' bos

printe des clous, clouer l ensempe, mette sul' coté un tchiot bout d' bo perpendiculair'mint comme cha cha faijo eune mitraillette

au bout du morceau d' bo qui faijo ch' canon , j avo cloué un tchiot clou , cha faijo viseur

pi bin sur un aut' in d' sous pour faire eune gachette

sans oublier que j' fixo 2 cavaliers , l un devant l aute derriere.

après j'passo un bout d' fichelle, et j auro pu accompagner john wayne quand qui combatto à guadalcanal conte ché japonais ou conte ché zal'mands dans le jour le plus long ...

y a des coups j' juo avec ché drilles à main , chéto l ancetre des perceusses actuelles

mais cha arsemblo avec un peu d imagination à eune tchiote mitraillette

savez dans la vie , faudro croire aux prémonitions , à la malchance diront certains, au destin dirons d autes .....

j' me souviens un coup in avo vu al' télé la veille un bio flime d' guerre , avec des jets d' grenate, des tac tac tac tac tac tac d' mitraillettes, j in passe et des meilleures

bin sur l' lend'main in allo juer avec mes camarates dins l' champ derriere en arfaisant l' flime d' la veille, et ch' coup là j avo décidé d' printe eune drille à main à min père , cha faijo eune belle mitraillette cha

quo qu' vous dire ? est ce que min père y a vraimint eu b'soin des' drille àch' momint là ? est c'que ché quéqu un qui m a vu sortir cha del mason in l' camuchant tant bien qu' mal ? est ce que ché quéqu un qui a cru de loin que j' juo avec eune vraie arme d' guerre?

j' sais pas, j a jamais su, mais j' do vous dire que quand que j' su arvénu al' mason d' avoir juer à la guerre dins l' pature, pourtant j éto "caud" avec min entrain'mint, mais là j' su tombé dans eune embuscate ...

j a pas réussi à traverser l' cour discret'mint en camuchant l outil sans qu' min père i me d'minte d' arvenir par ichi

bin savez ch' jur là...john wayne y a eu caud à ses fesses après ..........

yavot longtemps qu'j'avos pas vu chés engins la , du coup cor in fos ch'am'fait arpinser à chés chignolles , din l'temps, chelle in photo chétot impossipe bin sur ed' percher din l'béton
j'sais même pu si chés mêches in tingstène cha existot d'ja ?

mi l'première qu'j'ai eu al marchot al l'huile ed' keute aussi mais y fallot un bon martieau , cha s'appellot un temponnoir , chétot comme in importe pièche , et pour arriver à faire un tro d'in ch'mur fallot avoir ed' bons bras
chétot din chés années 70 , et ché avec cha qu'j'ai accroché min meupe ed' cuisine , yavot 4 tros à faire