l'clée..

Té n'as vu des mains passer sur ti
Celles ed manman , chétot les premiéres, vers 6h et d'mi, clac clac , j'étos core dins min lit , té t'rappelles?

Y'avot celles ed papa , ouais al t'ont souvint salie celles la, mais té sais intre sin carbon et sin gardin , i les lavot pas souvint. Té t'rappellles?

Quoi?? y'avot les miennes aussi toutes collantes ed bonbons , ej m'in rapplos pus ..

Y'avot celles ed Daniel qui rintrot d'ech bal , clac clac , in pleine nuit, té t'rappellles? y'é rintré qu'al disot Manman.

L'Samdi , chétot tin jour ed sortie, t'allos au marché bien muchée dins l'poche ed Manman avec ech'porte-monnaie Té t'rappelles?

L'soir ed mes 21 ans, ej croyos avoir tout gagné , ej t'ai fait tourner tout duch'mint CLAC CLAC que t'as fait , chétot ett façon à ti de m'saluer ou bien té voulos tous les réveiller pour leur dire que j'partais...

T'auros mieux fait de t'bloquer dins l'serrure ch'soir la cros-me

Et pis un jour, aprés ed nombreuss années aprés l'interrmint d'papa , quand j'ai compris que pus personne te fros tourner et bin j't'ai immnée avec mi, asteur, té là accrochée dins l'cuisine , té fais pus clac clac ed-pis longtimps, pas b'soin d'faire d'bruit pour ouvrir l'porte des souvenirs..

Allez à bas la tristesse et glisse-te dins m'poche, in va aller faire un tit tour au marché.

j a lu cha avec grand plaiji, j' m a meme dis "minloute, ti qui fait tant d' sujets , t as pas pinsé à cha ...."

et pourtant in avo aussi nos clés espéciales al' mason

la clé du garache au bout du gardin, eune lonque clef toute fine en espéce d' acier granité , avec au bout un porte clef des Etabliss'mints Millet

chéto un porte clé que té l' voyo la nuit, in plus chéto eune chouette in plastique

j' parlo que chéto en espéce d' acier granité, j' sauro pas vous dire vraimint en quelle matière chéto fait, pasque quand qu ale quéyo à terre in l arconnaisso inter toute

y a des jurs, j avo la confiance d' min père, avec un peu d appréhension aussi, j allo dins l' cour, pi j' traverso l' gardin, et là j introduiso l' clé dins l' porte


là j' prenno m' respiration ....pour printe toutes mes forches, et arriver à tourner l' clé à l interieur del serrure

pas si facile qu' cha, vu que comme ale éto lonque, ale avo comme eune tchiote bosse au miyeu et fallo vraimint printe l' coup mais ché vrai que chéto un peu un "sésame" ....

eune fo dins ch' garache ,j' cacho " tchiot martiau, tchiot martiau, du qui yest ? ah ouais y est là"

j in éto fier d avoir trouvé c' que min père i m avo d'mindé d aller li querre


l aute cléf que j avo ker , chéto la clef del barraque au carbon

là in auro cru que chéto la clef d eune porte d' chateau fort .......


le jur du qu in a vidé l' mason rue Anatole France, in a armis toutes ché cléfs au gars del soginorpa qui éto là

in li a donné ché clefs, pi tout c' qui yavo d' symbolique avec .....

eune fo dins ses mains, ale sont ardevenues des clefs normales , sans ame...

bin ya rin a dire , ché superpe ch'te manière ed' raconter in histoire ed' cléf de ch'te manière , bravo