dins l' tchiote cuisine qu in éto bien

j a pris un coup dins les niflettes taleure en apprenant le décés de Daniel

Comme j avo pas d' nouvelles d'li d'puis un momint , j y a invoyé un mail jeudi soir, mais bin sur j a pas eu d' nouvelles

mi Daniel, cha faijo un momint qui veno sur histoires de chtis , i connaisso bin Bruay, i avo tenu pendant eune paire d' années avec Mado ch' café Basly , chti que sul' coté i avo fait peinde des jueux d' football

in a comminché à s échanger des mails personnels

cha faijo un momint qu in l' croiso sur histoires de chtis, pi y a deux ans, quand que j' su armonté à bruay j ' m éto dit que j allo faire eune série d' photos à mon du cimetiere du 3 ..

j' me suis dit , si j va faire ché photos et que j' passe pas chez Daniel , j' pinse qu après j' va m' faire ingueuler

alors , en montant l' boulevard basly, j' a été buquer as' porte, comme cha , sans l' prévenir

Daniel y a ouvert l' porte, j a dis " bonjour ché minloute" , i m a ravisé, et i m a dit "rinte"

eune fos dins l' mason i m a dit " ravisse pas ch' désorde" , pasque sul' tape y avo plein d' viux journals d' la voix du nord qui éto en train d' arlire

tout d' suite i m a inm'né au fond del pieche et i m a dit " ravisse , j'te mins pas, ravisse quo que j' raviso à l instant", chéto histoires de chtis qui yavo sur sin ordinateur

in a discuté, commint vous dire, simplemint, comme si in s'connaisso depuis longtimps , in a bu du coca sans chuque

Daniel y éto djà suivi médical'mint d'puis un bon momint et in compto pas les séjours qui a fait à l hopital, parti in urgence, sauvé un coup in extremis......

peu d' temps aprés que j éto passé as' mason i devo s' faire opérer et i yavo pas l' grand moral , j' do meme dire qui avo peur d' l opération, j' y avo dit "acoute Daniel, té va passer au d' sus d' cha et l' prochain coup que j armonte à Bruay , j' viendra minger at' mason" .............

ch' t année j'devo armonter à bruay à la mi aout, mais Daniel y éto pas en grante forme

j' dos dire que j' pinse aussi à Bernard, Télévigile, qui do in avoir aussi gros sur la patate aujourd ' hui ...

avec Bernard in avo échangé des mails pasqu in s inquiéto aussi des' santé à Daniel

quand que j' su armonté à Bruay, chte mi aout, j a laissé un mail à Daniel, en li dijant que j armonto les 2 jurs suivants et que si y éto disponipe et qui éto en bonne forme , j'auro bin voulu l' vire ........

l' lend'main, j éto arrivé à la mapad d' bruay, ch'téléphone i buque, chéto Daniel, i m invito à minger l' lend'main midi ...

y éto contint d' em vire, i rintro cor tout juste d un séjour à l hopital

vous dire commint j a été archu, connaissez l' accueil tout simpe d' ché gins du bassin minier ..........

in a mingé dins s'tchiote cuisine, yavo aussi Mado et pi s' file
Mado ale éto génée pasque chéto "un r'pas tout simpe" ...

mon diu que j y a dis à Daniel et que j y a ardis par la suite , chéto tout simpe, mais qu in éto bin assis dins l' tchiote cuisine

va zy Dominique aprinds, profite , quo qu' té veux boire

Daniel i nous avo fait del palette à la diable , chéto un sacré bon momint, sans chichis , al' bonne franquette et j' vous avoue que là , j' a pris un coup d' louchet

j' pinse aussi et surtout à Mado et à s'file qui n' ont pas non pu été épargné ché derniers temps, eune pensée bien amicale à eux deux


Daniel,j' te l' ardis, dins t'chiote cuisine , qu in éto bien autour del' tape ...........

bin j'l'avos pas lu , cha m'permet ed' connaite un tiot peut miux Daniel , et aussi avec chés messaches d'amitiés qu'chés gins y ont invoyés