chés bigophoneux d'Hénin-Liétard

In zieutant sur les photos qu'on m'invo par mail de temps en temps, je n'avos gardé une pour in r'parlé aujourd'hui.

Ché eune photo des bigophoneux d'Hénin-Liétard.

Cha m'a fait arpinser que i avo quéques sociétés de bigophoneux din l'bassin minier.
Longtemps j'ai gardé l'bigophone de min parrain qui faizo partie del société des bigophoneux du n° de Bruay.
J'ai perdu l'trésor au fil de mes différents déménagm'ints.

Ech l'instrument là, in n'avo pas besoin de connaitte la musique, chéto une feulle de papier à cigarette din l'quelle in canto sans dire ché paroles.
Et mes gins étotent fort contints de défiler ainsi din ché carnavals in tout genre.

J'ai un vague souvenir d'avoir vu min parrain avec esse société défiler à l'ducasse du Bd Basly. Et i z'ont fait la rengaine devant le n°16 rue d'Marles du qu'al resto emme grand-mère maternelle.

J'ai dit ech l'instrument là... mais j'mexposse à la vindicte des sociétés musicales du Nord Pas-de-Calais : i se sont toudis opposé à ché bigophoneux in disant que chéto del moquerie invers la "vraie" musique...

Pourtant, même si chéto vrai, ché bigophoneux avotent bien l'drot de se divertir.

Merci jpp ed nous ramener à nos souvenirs lointains. in effet au N°3 y avo el société des bigophones qui faijeote el défilé al ducasse du N°3. du temps qu'el père Bailleux et ess' fill' que té conno bien iss' restotent au 5 rue Martel, chéto min proff' ed Sax

In tête chéto el garde champêtre avec sin képi et ess' rabillhure genre de Funès gendarme à St Trop'.
ess' profession, i éto boutefeu al Fosse 3 Bis ed Bruay.

cha ej min souvient bien,mais sin prénom y m'échappe, certains anciens, vont suremint nous aider..
Cha que j'em rappelle el fameux boutefeu, qui buquot din ché tall', iss' traino avec ses sacs ed poud' et d'amorces dinl' tall, et j'el vo cor avec sin patalon qui dévalo in bas ses gampes.. i éto sec comm' un rall'... Au secours Vauthier, à l'aide..

J'avo éteint min PC, mais el nom du garde champêtre m'étant arvénu j'el l'ai rallumé.. sin nom chéto Lépine, ech' cro bin qui resto dinl' rue ed La Martinique.. cor merci jpp...