avion cerf volant

zavez connu cha mes gins, ah rin qu à vire l' photo , zallez dire "mi j in a eu un " ...
d' toute fachon si in allo à la mer, yavo quat' objets j' diro incontournapes

ch' cerf volant, l'épuisette à crevette, ché seaux et ché pelles

ché mamans ale rajouterotent "oublie pas la crème solaire..."

qui éto suivi de " va pas à l io tout d' suite , faut attinte tros heures" ...mais cha ch' est un aute sujet ...

bio temps su la plage, marée basse d' préférence , afin d' pouvoir i juer tranquil'mint

nan j ' arcomminche par ch' début

eune fo qu in arrivo à Merlimont pour mi, Stella, Saint Valery, Fort Mahon ou Berck pour d autes , in traverso l'estation balnéaire pour s' rinte à la mer

et savez ché marchands du temple comme auro dit jesus , i faijotent tout pour attirer not' regard et faire ouvrer ché portemonnaies des parints ..

quand que j' dis "marchands du temple" ch'est normal aussi faut dire que la saison touristique ale duro pas si longtimps qu'cha, in plus i minquero pu qui pleuffe durant juillet et aout et cha réduiso cor l'momint propice du que ché estivants i zalotent acater des juets d' plage pour ché zéfants ...

in passo d' vant ché magasins, mon diu, j' vo cor ch' grand magasin su la gauche, au dé d argent qui s appelo, avec bin sur un immense dé à coudre qui éto situé au d' sus del porte , pi plus loin su la droite , in face du marchand d' journeaux yavo aussi un aut' grand magasin d' juets ...

chéto que ribambelles d' ballons accrochés in hauteur, présentoirs d' cartes postales, étalaches rimplis d' juets in plastique d' toutes sortes, pelles in fer dins ché rateliers, bouées in plastique accrochées comme des rangées d' saucisse, sans oublier ch' grand batiau gonflape , qui trono comme un sémaphore in hauteur pour qu in puisse pas n' pas l' vire

pour ché cerfs volants, chéto parel, yavo tro quate modeles d' exposés in hauteur , mais pour nous ché pitits, chti qui avo grinmint d' succés, chéto l' avion en plastique

ouais j' dis cha pour ché plus jones, chéto un avion en plastique, avec des ailes qu ale tournotent au vent

cha faijo un bruit caractéristique, qu in intindo souvint in fond sonore su la plache , chéto l' momint du que parints i freumotent l' neule, qui comminchotent à ronfler, qu in pouvo juer avec l' avion mais attintion "juste d' vant" "que j' te vo toudis " ....

chéto un sacré juet pasque comme chéto léger, fallo pas grinmint d' vint pour qui s invole

in y juo sur la plache, mais i avo un aute avantache, ch'est que quand que "ch' temps i faijo un mouv'mint", expression d' em mère pour dire que ch' ciel i éto bin couvert et qui avo grinmint d'nuaches qui passotent , quand qu in pouvo pas s assire l' long d' la plache .....

...in allo dins ché dunes

chéto eune expédition aussi, ché parints i prenotent ch' sac avec ch' gouter, ch' tricot et ché zaiguiles et le "ptit écho d' la mote" ou "modes et travaux" pour madame, ché juets pour nouzautes, et la voix du nord pour ch'père..

quo qu in immeno dins ché dunes comme juets? alors fallo pas trop s' querquer, in prenno ch' jeu d' boules, un séyau eune pelle, pi ch' cerf volant

in allo dins ché dunes , ché parints i s installotent à l abri du vint, bin sur in avo "not' p'tite laine" sul' dos,

nous ché zéfants, in avo eu dro, mais après avoir bin insisté, d' pouvoir artirer nos sandalettes, meme si l' mère ale avo sorti ché derniers zargumints, "attintion à ché épines , attintion d' pas printe frod"

nous in auro pas frod vu qu in allo s' mette in haut d eune dune , printe l' sins du vint , et faire monter rapid'mint nos avions cerfs volants in plastique

in s amuso , d' la haut, d' déchinte à toute blinte , pour qu in a l illusion que l' avion i grimpo bin plus haut

mais fallo s' méfier, pasque si in donno pas assez d'mou ach' fil in nylon quand qu in déchindo, cha arrivo que cha casse et que adieu berthe in l' voyo d un coup batte d' l aile

ch'est l' cas del dire ...

aussitot in armonto pour l' rattraper, ah ouais, chéto pas la peine d aller arbraire un deuxieme navion à ché parints, in avo dro à "t avo qu à faire attintion"

ch' est pour cha , après s avoir fait eute au moins un coup, in cacho un coin dégagé, surtout loin d' ché zindrots du que poussotent ché espéces d arbustes à épines qui couvrotent souvint l' bas d'certaines dunes, et que chéto après impossipe d y pénétrer pour essayer d' récupérer ch' l avion qui éto qué là d' dins ....

tchiot avion , grinmint d' souvenirs pour tertousses