minloute vikingue

si si quand que j a été tchiot j a été vikingue, ch éto à la suite du flime "viking" du que d'dins yavo queurk douglasse et tonicurtisse qui juottent

savez avec l' son du cor dins ché fiordes, ché batales autour du chateau fort in angleterre .......

mi j a été vikingue, cha m est arvénu ch' matin, en ravisant dins l' garache, j' avo gardé l' pince à buée que m' mère as' servo
savez l' pince pour attraper ch' linche et l' sortir del' bouilleusse .........

in fait j avo l équiqu'mint complet, avec l' pince que chéto m' n épée, et pi ch' couverque d' lessiveusse que cha faijo un bon bouclier

pour ch' bouclier yavo pas d' problemes, pasque zavez armarqué ch est toudis c' qui reste, cha s' use bin moins vite que l' bouilleusse en elle meme, quo que elle, ale finisso s' vie in poubelle au bord dech' trottoir ....

et des couverques d' lessiveusses, y en avo toudis dins l' fond d' el barraque aux chats

ouais chéto l' nom del barraque au fond du gardin comme diro l' canchon de Cabrel ... chéto plutot un auvent in tole ondulée

m' mère ale avo ralé un coup pasqu ale avo pas artrouvé l' pince un diminche soir , j' l avo oublié avec mes pistolets et min fusil in plastique dins l' barraque au carbon

ouais ch' éto l' nom d' l' aute barraque du qu in a du y entreposé du carbon cor que mi j ' in avo jamais vu là d'dins ....

donc m' mère, j arviens à elle, ale m a dit qu ale voulo pu que j'jue avec l' pince

que j allo l' abimer, que j allo casser ch' lien en cuir qui arteno ché deux morciaux d' bos ....

donc j a été "inspecter" l'barraque aux chats, enfin ch' bord, vu que ch éto plutot un amoncel'mint d' affaires, intre l' brouette, des viux rouleaux d' grillaches, des outils avotent du connaite l' front populaire, et certains Clémenceau au pouvoir .........

pi chéto rangé d'eune façon que chi té prenno un truc , fallo faire attintion d' pas tout d' printe dins l' guiffe ...

donc j a trouvé à l intrée , 2 viux morciaux d' rames à po, que j a scié , que j a cloué ... et j m a fait eune épée digne d' thierry la fronde

cor que bin sur j' me suis fait ingueuler, pasque j avo laissé l' scie dehors et qui yavo plu, parel pour l' martiau

mais am' décharge, j éto fort occupé à juer

ah j avo ker juer au vikingue, jusqu au jour ou min frère y a ramné un autocollant Antar, savez l' ancienne marque d essence que ch'éto arprésenté par eune espèce de gaulois in armes....

et quand qui m' voyo juer avec ch' couverque, i m appelo Antar ......
d' guerre lasse , j a rindu les zarmes, et j a préféré arjuer aux coboles et aux zindiens .....