Les jardinsal boutique
par Marie-Claire le, 02/11/2005Poème de Théophile Denis
D'min teimps, un allot au boutique
A mon d'eunne veffe applée Gélique.
Ein poussaint chelle porte, un foaijot
Berloquer un diabe ed guerlot
Qui m'not autaint d'tapache euq diche.
Ch'magasin n'avot warde d'ête riche :
Il avot ds'odeurs ed court fien
A foaire éternuer un thien ;
Su ch'comptoir guilot du fromache
Qui vos eimpestot comme la rache.
Dains l'coin, dù qu'i n'foaijot point clair,
Peindot eunne balainche ed blainc fier,
Et Gélique, sains qu'i n'uche dé s'faute,
Peuvot preinde un pods pour un aute...
Alle veindot du chuque, du café,
Des caindelles, ed l'ole et du sé.
Ds'aiwuilles, des agripins, dél loaine,
Des ramons d'bos et d'camameinne...
Jé n'sais pus chou qu'a n'ténot point :
Ch'étot du chirage, du viux-oint :
Des bâtons d'culisse, dé l'perzure,
Et du pourclou pou chl'eimpleumure ;
Des champreules, des brouches et des clos,
Des louches, des wassingues, des chabots...
I n'mainquot point d'toiles d'araingnies,
D'minous, d'poussière et d'cosses mugies,
Et j'ai vu Gélique bein des fos
Mouquer sin nez aveuc ses dogts
