Le 3 de Bruay-en-Artois (quartier C)

Quartier (C) : Pisqu’un est din l’rue d’la Cavée on y rest’ Après Sophie on passe sous ch’pont d’el ligne ed quémin d’fer. In reste sus ch’côté gauche ; el l’rue al tourne à gauche et là y avot un’ pétit’ plach’ avec el l’café à Mémée Jarette après, din l’axe d’el l’rue qui tourne à droite chette fos, l’impasse Devise.

Là chétot pas la joie pasque chés maisons chétot des tout’s pétits baraques, ach’t’heure in dirot preque un bidon ville. Ch’tot un quémin d’terr’ qui continuot par un’ lonqu’ voyette qui nous am’not al’l’rue Coquel à travers chés gardins. Din ch’tournant à droite d’el l’rue d’La Cavée, au début d’el l’rue Devise un commerce amon Deruy (avant chéto Roys Lagache qui étot là avant d’faire construir’ lu magasin in face del l’rue d’Constantine

A côté d’Deruy chétot un’ plach’ édu qu’partot l’rue d’la Martinique avec un bistrot juste in face. Au milieu d’el l’rue d’la Martinique à droite, el l’rue Fort de France qui déchind vers el l’rue d’la Cavée presqu’ in bas à gauche, el l’rue Sainte Lucie avec des pétit’s maisons d’retraités ; au but in voyette qui longeot l’lign’ ed quémin d’fer jusqu’à rue Coquel.
On arvient in haut au niveau d’amon Sophie. Là on pass’ à droite on passe d’sous ch’pont, deux maisons et à droite un’voyette qui t’amène din l’rue Lecomte.

Din ch’virach’ à gauch’ du début d’el voyette donc y avot l’maison à Coyette din ch’fond (vous suivez toudis, si nan, ravisez min plan) à côté mais sus l’rue d’la Cavée din ch’virach à gauche, ch’débit d’tabac Louis Dussart et un peu après un magasin d’tapisseries (ach’t’heure on dit papier peint) et on arrif’ face à amon Deruy là édu qu’el rue al déchin assez fort.
Ch’tot un’ bell’ crinconne à monter à vélo comme éch boulevard Basly , el l’côte Bonnet ou chell’ des Agaches.
Pas grand caus’ à dir’ sauf, din l’côte à droite el l’rue d’Saint Omer et in bas, el long d’el lin’ ed quémin d’fer, ch’quémin latéral. Si qu’in pass’ d’sous ch’pont on a chés garach’s ed chés pompiers, mais là on est din l’quartier du vieux marché.

On prind donc éch quémin latéral (el’ bass’ d’éch quartier (c). J’in vos qui s’indort’t là, ch’sais ben qu’ché long mais si qu’té veux t’artrouver din ch’temps là, y faut t’dir’ qu’el dam’ GPS, al saurot pas t’el l’dir comme mi ; j’ai mes pieds qui gonf’tent ! Donc, din ch’quémin latéral, à gauch’ el l’line ed quémin d’fer à droite el’l’rue d’Montreuil pi chell’ d’Hazebrouck, des camps qui montent jusqu’à l’nouvell’ école Félix Faure, ben plus loin l’impasse Quinet et on arvient din ch’boulevard Basly au niveau d’éch pont.

In armont’ avec des commerces à droite, un magasin d’alimentation, un marchand d’bonbons et papetrie à ch’décrochag’ d’éch trottoir , un café, pil’drogrie Sobanski, un magasin d’landaux et d’jouets amon Dransard, pi après Membré magasin d’vaisselle, ch’fleurist’ Baudelot, un photograph’, chés tissus Verron avec à côté un aut’ magasin à eux avec d’l’électroménager, pi au pied d’el l’montée un peu plus rait’ Maxime Heinguez qui vindot des télés.

In haut l’école Félix Faure (j’y sus qu’allé pour em’ première année d’grant’ école pasqu’après al a été démolie pour faire ell’ nouvelle din l’sentier Lebrun, à droit’.
Après ch’sentier ch’tot l’pharmancie Boucly, un’voyette in « L » qui arvénot din ch’sentier Lebrun, un’ maison d’maît’ avec un bieau gardin devant, après un’ maison d’mineur qui penchot vers el l’rue comm’ el’l’tour ed Pise, j’comprinds pas commin qu’al pouvot ténir ed d’bout.

Après l’bouch’rie polonaise Buczack, el’ l’rue Lecomte derrière un aut’ rue d’Dieppe ? pi l’rue d’Boulogne juste in face del’ lin’ ed quémin d’fer. Té pal din vue y avot qu’deux tros mètes intre chés maisons et ch’rimblais d’éch quémin d’fer. A ch’t’heur, on rinte din ch’carré là.
El l’rue Lecomte al tourne in bas édu qu’el’voyette d’el l’rue d’la Cavée (à côté d’amon Dussart) a l’ariv’. Just’ in face y avot l’cent’ médical avant qui n’vinch’ in haut d’el l’rue d’Alger. Chétot ch’docteur Andrieux qui faijot chés consultations.

Après, un carrefour avec à droit’ éch sentier Lebrun avec el’ nouvell’ école Félix Faure du qu’ai j’ su allé. In face d’éch sentier Lebrun l’rue d’Saint Omer avec à droit’ el l’rue d’ Cambrai pi chell’ d’Valenciennes et on arriv’ din rue d’la Cavée.
A ch’carrefour, droit d’vant l’rue Lecomte, l’rue d’Hazebrouck avec à gauch’ l’rue d’Roubaix, l’rue d’Tourcoing et pi ch’quémin latéral.