après ch' catéchisme
par minloute le, 28/11/2015j' espère mon dieu, que vous nous zavez pardonné, in allo au catéchisme juste à coté d' l églisse sainte barpe, in avo eu l abbé héripret, soeur marthe, pi l abbé grard pour nous apprinte la vie du seigneur
meme qu un coup j' me souviens i avo fallu réviser et in passo chacun sin tour devant l abbé heripret qui nous poso des questions plus que faciles
nan, aller au catéchisme, cha nous imballo moyenn'mint, mais yavo quand meme quequ' zinfants comme mi qui étotent ed' l école loubet , plus eune paire qui étotent du 1,et in a vite formé eune tchiote bande al' sortie d' not' "rinconte avec le christ"
d' abord i n avo toudis qui avotent plus d argent d' poque qu' les zautes, so ché parints étotent plus généreux, so i avo archu eune dringuelle inter temps , bref, in allo toudis acater des bonbons in armontant l' rue d' la chapelle, et yavo un tout pitit commerce pas loin del salle d' judo et du café à mon tilliette
l ' femme qu ale tenno cha ale éto aimape comme eune porte d' prison ou alors ch'est pasqu in rintro à 8 d' in sin magasin , j' sais pas ...
mais l' miu d' tout cha, chéto pas ché bonbons, y n avo un qui avo so acaté so i avo "récupéré" un paquet d' cigarettes blontes del marque saint michel , ch'éto un paquet vert, j' a des bons souv'nirs , j a vérifié après su internet
j' avo l impression qu ale zétotent plus pitites, enfin moins lonques que ché royales ou ché marigny par exempe
in s installo du coté d' la place l herminier et in armonto par ch' pitit pont , cigarette au bec,in toussant un tchiot peu quand meme, et quand que j' dis clope au bec, plutot camuchée par eune main, pasque in pouvo toudis s ' faire attraper
faut dire qu in avo plein d illusions, in pinso qu in nous voyo pas , mais que voulez vous , à huit à armonter l' rue, in camucho pas forchémint s'cigarette tous insempe
j avo eu dro à un coup, " in t as vu finquer rue jean baptiste petit" mi , j' fais des zeules comme des boules d' billard, jurant , que ch éto pas mi, mais un aut' qui li finquo , mais qui mi nan
que meme si i v'notent m' sintir l haleine, chéto l 'finquée des zautes qui faijo que j' sinto l' toubaque ...
naif minloute comme si ché parints i zétotent pas dupes ...
mais ch'éto pas tout, eune fos arrivé dans la rue d' la gendarmerie, i n avo toudis un qui s approcho d un coup d eune porte , in l' voyo juste après courir comme un dératé , preuffe qui avo à tous les coups, appuyé sul' sonnette, alors là chéto l' débandate dins l' sentier des tombelles, l' voyette qui permetto d arjointe la rue de denain en longeant les batimints de l école loubet filles
on arprenno alors not' souffle, en ravisant quand meme si in éto pas suivi par quéqu un, in arprenno not ' air innochint, pour tourner au coin rue d' denain, comme si de rien n étot
in plus in avo un des notes qui habito presque en face, suffiso qu' sin père i so dinch' gardin à fuir, et si nous auro vu déboucher in courant dins l' rue i se sero posé des questions ...
cha comminche à faire eune paire d années tout cha