comme un tableau flamand

j osero pas comparer ch'te photo à un tableau flamand, j ' iro pas jusqu à parler de " lumière de l ombre" , mais j a vraimint ker chte photo

ale date de 1970, pour les 25 ans d' mariache d' mes parints, savez i zont eu la chance d' pouvoir faire leurs 50 ans d' mariache insempe...

et in "bonus" queques zannées d' vie commune in plus .....


bon arvenons al' photo, vers la fin du r'pas ou à l occasion du trou normand ...

in y vo debout , et qui artient l attention d' tout l' monte, li chez "mononquoctaff" , si vous préférez miu, "mon onqu' octave", l' frère dem' grand mère ......

si yartient l attention d' tout l' monte, ch'est qui raconte eune histoire, s' n histoire.....

savez , lors d' ché mariaches, y a ché canteux, pi ché canteux occasionnels, ceux qui saffent qu eune canchon et qui nous zarsortent à chaque repas ...

pi i n' a comme mononqu' octaff, qui savent te pas canter, mais qui ont EUNE histoire "drole" à raconter

eune histoire drole que tout l' monte autour d' la tape i conno la fin, sauf ch' coup là , la serveusse qu in vo en retrait ....

assisse au premier plan,qu ale acoute bin sache, ch'est Clara eune cousine à min père, qui éto d' tous ché repas d' famile, et ale s intindo bin avec tout l' monte, et bin sur avec mononqu' octaff

assisse au second plan , chez "matant' marie" , l' femme à mononqu'octaffe

ale le ravisse, j allo dire blasée, vu que pour toutes ché sorties qui faijotent mononque i raconto toudis l' meme histoire .........

d' ailleurs in d'mindo pas à octaff d' raconter eune histoire, in li d'mindo directemint' l histoire avec "l' tailleur écossais "....

mononque i faijo toudis chti qui éto étonné qu in li d'minte ch' t histoire là, comme chi ale éto irresitipe, alors que chéto la seule qui connaisso

quand qui la raconto, et là j' vous in parle avec les ziux et les zoreles d un garchon d' tout juste 10 ans , in auro dit qui raconto pas l histoire mais qui la vivo.....

li qui éto toudis en retrait, faut dire que la tante marie meme si ch'éto eune méguerlote, ch'éto elle qui dirigeo tout al' mason ....

bin là, dés qui débuto sin sketche, i éto comme transformé, i prenno meme l accent britannique, enfin c' qui pour li s in rapprocho l' plus .....

i nous la raconto, avec eune voix déjà bin voilée, par l' toubaque et l' anisette .....

vous raconter l histoire ,j' in sero bin incapape asteure, j' me souviens que cha parlo d'un monsieur qui allo acater costume tout neuf in tissu à carreaux , écossais bin sur, et ch' tailleur i éto écossais aussi bin sur ....

i yavo des histoires d' puches j' cro bin, et pour les faire disparaite, i demindo ach' tailleur d' les taper avec eune tapette à mouques....

mais fallo pas qui tape n importe du , ch' tailleur, alors, pour li faciliter la tache, i avo d' minder à c' qu in numérote à la craie ché carreaux

et que pour vire dins sin dos, du que l' tailleur i devo taper, i avo un miroir, et qui dijo à l aute, escusez me si j' peux pas vous arproduire sin accent, i li dijo un truc du genre " monsieur, veuillez tapez le caleau numélo tleize s il vous plait"

et cha faijo rire ou sourire tout l' monte ............

1970, la tante Marie, ale a pu que 4 ans à viffe, mononqu' Octaffe i l a suivra 2 ans plus tard ...

ch'est cor not' Clara, qui vivra l' plus longtimps, en partant l année des 50 ans de mariage de mes parints .....