carettes d' la rue leverrier

j a parlé juste avant d'la voiture à monmononque, eune simca Ariane, et celle d' min père eune 403 break Peugeot grise

j a d autes souvenirs, tchiot, des carettes d' la rue leverrier

yavo un vigin qui garo such' trottoir en face d' chez nouzautes, eune viele simca aronde

mon diu que malheur si té comparo l aronde à l Ariane, yavo pas photo, cha faijo tout pitit

pi m' mère ale éto pas rassurée que chte carette ale so garée là in face d' es' mason, pasque yavo pu d' bouchon à essence, chéto un chiffon

minquero pu ch' a saute qu ale dijo m' mère, in ajutant " j' su pas rassurée" ......

eune aut' carette que j avo ker tourner dins la rue chéto eune 203 Peugeot

j' sais pu si ale apparteno à mr Mehay , ch' vigin d en face, ou à mr Maerte qui habito juste derriere

chéto pas l' carette par elle meme que j avo ker ,quo qu ale faijo djà un peu ancienne, nan c' que j ' avo ker raviser chét sin clignotant

pasque sul' coté del carette, yavo eune tige , d' couleur rouge, qui sorto pour montrer du que té tourno

et croyez pas que j' affabule, j' vous jure que cha existo



après y a deux zautes carettes que j avo ker, mais là , comme diro l aute , fallo s' garer

pasque sin conducteur i rintro dins la rue souvint à toute blinte, et à chaque coup, m' mère ale dijo " y a un jur du qui yaura un asquident"

l' premier carette ch'éto eune panhard, j a essayé d' raviser ch' modele j' cro bin que chéto eune pl 17

alors ch'te carette chéto et ch'est toujours un ovni

y a rin qu a raviser ché courbes, cha fait carette qu in pourro vire dans mars attaque

l' couleur aussi, ale éto d un vert clair un peu passé, mais tout cha chéto del gnognote en détal, pasque l' plus étonnant , chéto l' bruit d' castrole que faijo ch' moteur

sur qu à l époque té pouvo arçonnaite au bruit si chéto eune 2 cv ou eune panhard quale passo

cor que l' panhard ale avo un bruit vraimint d' castrole qui traine , attachée au pare choc arriere del carette ....

ch' monsieur là y a cangé d' carette et là i avo acaté un bolide, eune NSU , alors là té l intindo tourner dins l' rue, que bruit qu ale faijo, in sinot qui yavo d' quo such' moteur ......


comme aute carette, bin sur, yavo la 2 cv ,mais chéto plutôt al' conduite qu in savo qui chéto qui la conduiso, chéto l' carette à louise defernez

et louise defernez au volant, t avo interet at' camucher

as 'deminder si ale appuyo pas such' frein et l accélérateur en meme temps .......

après in avo dro chaque jur au passache de "maïs" , in l appelo comme cha pasque i zétotent deux , deux viux à beret, qui vindotent d' tout , surtout pour ché animaux

des graines pour ché coulons, j' me souviens qu in voyo d' grands saces à l intérieur du hy citroen taulé, d' couleur grisse

such' tot yavo eune galerie et d' sur des bales d' pales

après , yavo eune carette ou plutôt un camion que chéto moderne, chéto eune camionette Peugeot blanche , savez ché camionette avec hayon such' coté ,qu in vo su ché marché

chéto l' camion à mr Mouton, chti qui vindo des produits fromagers et qui passo tous ché jurs

in peut pas clore ch' chapitre là sans parler d' el traction à Abel, Abel ch' cinsier qui livro du bure et des zu et qui passo l' jeudi

Abel in auro dit Bourvil avec sin beret et ses maronnes rintrées dins ses cauchettes

quand que j' vous dis que chéto l' jeudi qui passo et que j in su sur, ch'est que à eune époque , asteure révolue, ch'éto l' jeudi qu in allo pas à l époque

asteure , tout cha , cha appartient au passé ...

Ouais Minloute quand t'étos in voiture et qu'té voulos tourner fallot mette t'flèche, ch'est comme cha qu'cha s'applot, eun' flèche rouch' qui sortot de l'carrosserie, fallot vraimint faire attintion pou l'vire, j'cros minme qui avot pas d'ampoule enn' dins.