porions facebook

mais d quo qui parle minloute ?

pour ceusses qui ont pas facebook, et j in conno un que je salue au passache

alors quo que cha n 'est que le poulet facebook ?

ch'est eune photo du que té vo un poulet archi cuit, in pourro dire carbonisé , avec la mention poulet facebook , vu que y a du et' laissé à cuire au four trop longtimps pendant que l'personne qu ale la mise au four ale éto occuper à surfer sur l arnitoile ...

j' do dire que cha m est arrivé, j avo été querre ché derniers porions que m avo donné un camarate d' traval, (j' les avo arpiqué)
j' les nettoie , j' les rince, j' mets dins ch' bio faitout in inosque d' chez ikéa, j' mets de l iau , pas grinmint quand meme j avoue et j ' m in va sur min pc

j' voudro quand meme dire que j 'm a levé à un momint pour vire si chéto cuit

j' voudro quand meme dire que j' avo eune sacrée chiffernée , et que j' sinto pas la cuisson ...

si té sins pas la cuisson, té sins pas non pu quand ch'est trop cuit

grand mère d un coup j' l intinds qu ale rale, mi j a l habitute, j avo min casque su mes zoreles, j m' a dit ch'est pas sur mi qu ale rale , bin si ...

arrivée catastrophique dins l' cuisine, ch' éto pu un faitout, chéto devenu eune plancha...

in plus del finquée qu ale s' a dégagée du couverque, in a frolé la mise in route d la sonnerie d alarme .....

l' odeur d' carbonisée , ale a invahi l' mason, cha a meme fait réagir m' file à l étache , ale croyo qui yavo un incendie

"nan " qu ale dit grand mère " ch'est tin père qui fait la cuisine " ......

ah j' éto désolé savez, des bons porions pour faire eune bonne vinaigrette pi des zéchalottes avec .....

mais j' a vite artrouvé mes esprits, pasque grand mère ale arreto pas d'dire " min faitout y est foutu" , " min faitout y est foutu" .....

mi j a vite compris, si faut canger ch' faitout, ch'est direction ikéa...

connaissez ikéa ? Ch' magasin qui faut faire chinq kilometes pour arriver à la caisse ...

et que pendant chinq kilometes, in arrete pas d' vous attirer pour acater par chi , acater par là ...

sans oublier l' piege vers la fin , du qui a les artiques ménagers....castroles, assiettes , couverts etc...

que t as prévu d acater un truc que t arsort avec 2 grands sacs pleins

rin que pour cha j' m a proposé d' essayer d' rattraper l' castrole in la briquant d' toutes mes forches ...

grand mère ale mis du produit d' dins , ale a fait cauffer et miraque , tout y est parti, ouf, in a évité d' faire cauffer la carte bleue...

mais in m y arprindra pu, pour un coup que j' veux faire à minger , cha dérape, j' va laisser cha définitiv'mint à ché professionnelles ...

avant quand qu'j'avos eune casserole ou un faitout qué ch' fond y étot tout brûlé, j'é l'laissos trimper avec du liquide vaisselle tout l'nuit pis au matin j'essayos dé l'ravoir avec eune éponge in fer.
Mais cha abîmot ch' revêtemint et des éponches in fer in in trouve pus; alors j'ai trouvé un truc : j' mets bouillir éd' dins un fond d'iau avec eune ou deux cuillères éd' bicarbonate . Généralement cha suffit et ch' cul y' ardevient tout blanc.
Et si cha suffit pas, j' réssaye avec dé l'iau d'javel...
A vos fourniaux ! A vos casstroles ! ....