coureurs cyclistes bon souvenir

j' m arvo cor assis al' tchiote table d' la cuisine, buée sur ché vitres, et dos au caud derriere ch' fourneau , avec d' vant mi tout mes coureurs cyclistes que cha couvro bin toute el' surface ,,,

j in éto fier, bin sur fallo qu' min frère i passe alors que d eune main qui s' voulo anodine, sans l' faire d exprès , qui in faijo querre eune partie les uns su les zautes comme in auro pu faire avec des dominos ,,,

mi bin sur j' ralo, colère quequ'fos coups que j y metto , et coups qui m ardonno et vu l' différence d age , cha finisso toudis que j' brais ,,,,

l' tape del cuisine ale éto rimplie, j in avo d' 2 sortes, ceux que j'préféro , in férale et peints, et z'zautes plus nombreux, en plastique

faut dire que chéto l' essor du tout plastique, ah ch'est sur que té pouvo euh , plutot t'mère ale pouvo t acater des pochettes d' cyclistes à mon Defernez, la "mercerie, artiques funéraires, stylos, cahiers,,,,et jouets in plastique)

bon faut dire qu in in avo l' nombre, mais souvint chéto limité à tro quates modèles ,,,,,,
ch' coureur courbé en avant ,ch' plus nombreux,
ceusses qui roulotent en danseuse comme Bahamontes, moins nombreux,
et un seul qui metto ses bras in l air , normal i pouvo y avoir un seul gagnant ,,,,

coté couleur, bin chéto plus que limite, chéto dans la "masse", t in avo des tout jaune, des tout rouge, des tout vert ,,,

d ' la tete au vélo , in passant par ch' maillot l' cuissard et les gampes , chto d eune seule couleur ,,,

chéto vers la fin des années 60 et meme si yavo quequ' retransmissions à la télé , chéto pas cor comme asteure

à défaut d' les vire souvint, j' liso les exploits du tour de France dans la voix du nord durant les vacances , et j avo ker artenir l' nom d' ché coureurs surtout si zavotent des noms qui m' simblotent bizares

comme van springel, roger pingeon, jan janssen, lucien aimar, sans oublier not' poupou national ,,,,,,

souvint j' m invinto des courses, et j imito ché commentaires des reporters qu in intindo lors des retransmissions such' transistor

ch éto facile à acouter vu qu' min père i demindo l' silence total quand que cha allo et' la prise d antenne d un journaliste esportif qui couvro la course ,,,,,,

ah j in a arfait des ascensions , d' zéchappées , j in a arproduit des chutes , j in invento des scénarios à rebondis''mint

un grand regret, ch'est que plus tard, ché coureurs là qui so in plastique mais surtout in fer, j a tout foutu al' poubelle , bin ouais j allo pu y juer ,,,,,

ah si jeunesse savait ,,, mais ch'est trop tard pour braire ,,,,