coureurs cyclistes mauvais souvenirs

cha parto d un bon sentimint, j' do dire que j éto un des plus enthousiastes , mais cha ch'éto min coté poéte ,,,

j' vous dijo que cha parto d un bon sentimint, ch'éto l' idée de Monsieur Pruvost m' n instituteu de CM1 à l école Loubet d' Bruay

alors j' sais pas si faijo cha pasqu in éto eune "bande d' briles" comme i nous dijo quand qu in devo s aligner avant d' rintrer en classe et qu in éto trop mou as' mode ,,,,,?

en tout cas, vla ti pas qui nous d'minde à chacun d'ram'ner pour la s'maine qui suivo, un coureur cycliste qu in devo tous avoir dins nos juets ,,,

le but ch'éto d'faire comme eune compétition, et qu in pourro suive comme cha not' progression durant l'mo qui allo suive ,,,,

lundi yarriffe, in donne tous not'cycliste ach' maite, comme i n a qui ont l'meme , i met des pastilles par chi et par là pour qu in puisse pas s'tromper ,,,,

et nous voilà tous mis au départ d eune ligne qui avo tracé au sol ,,,

ouais , i avo fait cha dans l'détail ,,,,,, le parcours i s' faijo au bas d ' l estrade , et pour corser l' tout , certain'mint pour nous interesser , y avo fait comme des montanes et des déchintes ,,,,

ah j'trouvo cha bien,,,

mais après ché premieres notes, j a vu que j' arjoigno duch'mint mais sur'mint le miyeu, pi les 3 /4 dech' peloton

in fait cha faijo comme dins ché coursescyclistes d asteure, i n' avo toudis qui s' détachotent du peloton , as' deminder si zétotent pas dopés ,,,,,,,,

yavo ch' peloton des suivants, mais mi j éto pas d'dins,,,

pi plus loin , bin plus loin , yavo comme in dit asteure " le groupetto" ,,

savez ch'est ché coureurs cyclistes qui juent pas les premieres plaches, mais qui calculent pour faire un minimum d efforts pour pas arriver hors délais ,,,

bin mi j éto ch'chef du groupetto ,,,

quo que j auro du freumer m' guiffe al' mason quand que j avo parlé d' l idée dech' maite,,,,,

que d'vant mon enthousiasme , min père i m avo arfroidi d un coup in dijant, " j espère que té portera ch' maillot jaune" ,,,,,,,

mi j avo répondu évasim'int savez un peu comme Meercks quand qui a pas gagné, que chéto pasqui avo crevé, y avo été malate, y avo eu del drache, enfn plein d' raisons qui font que j' pourro pas ete such' podium,,,

in in parlo plus et cha m arringeo , jusqu au momint du qu un soir à tape, min père i m' deminte si j' éto dins ché premiers ,,,,,,
vu min silence, ou au moins l' temps que j a pris pour réponde, i s a pas fait grinmint d illusions,,,,

ouais qui m' dit, d' toute façon in verra cha avec tin carnet ,,,,,,,

ah j in a intindu parler d'mes résultats à la fin du mo, qu' min père i m a dit que si cha continuo j auro pu d argent d' poche si j' cangeo pas d' braquet ,,,,,,,,,

cor heureux in a fait ch'te course à vélo que durant un mo,,,,, ch'est pas pour cha que j a pas eu les "peut mieux faire" , les "passable" de d habitude

cor que ch' maite i avo mis eune appréciation que j avo pris en pleine guiffe quand que min père y a arvenu sul' sujet

ch'éto marqué " plus proche de la voiture balai que de la ligne d arrivée"

allez print cha dins des dints minloute ,,,