L'Fiète du 14 juillet

L'Fiête du 14 Juillet

L'bin courte II° république (1848-1852) alle avot keusi (choisi) comme Fiête el 5 Mai, date anniversaire d'l'overture d'chés Etats Généraus. Pindant l'trosième République, in 1880, l'Cambe présidée pa Gambetta alle busie (pense) à mette su s'n'calindérier eine grante Fiête nacionale.

Queul jour printe ? I n'd'a qui voulote printe el 20 Juin date du célèpe Ju d'Paume pou ramintuver (rappeler) l'célèpe parole du Comte Mirabeau qui a buqué ( frappé) comme el tonnoire (tonnerre) edvant ein varlet arprésintant du Ro Louis XVI et tranant (tremblant) d’bleusse frousse :
" In est chi pa l'volonté du peupe, in in déhuttra foque pa l'forche des baïonettes !"
D'aut' députés i volote printe el 4 Aoüt, date ed l'abolicion des privilèches, d'zaut' el 20 Siétimpe date dé l'preume séance dé l'Convincion. Infin, d'z'aut' avote ker (aimaient) el 14 Juillet, jour dus qu'in avot pris l'Bastile mais aussi l'jour anniversaire dé l'preume Fiête dé l'Fédéracion. Ch't'alle chile (celle-ci), in l'avot célébrée el 14 juillet 1790, pou moutrer (montrer) l'ramistage (réconciliation) inter les gins du peupe. Ch'est final'mint l'date du 14 juillet qu'in a arténu pasqu'alle ramintuvot 2 sins politiques : l'démanoquache (abolicion) dé l'tirannie (prisse dé l'Bastile) et l'unité nacionale (Fiête dé l'Fédéracion).
L'Fiête alle sé passot à Longchamp. Pis, in 1915, in fait l'preume défilé aus Camps Elysées pou marquer l'artour au Pantéon des chintes d'Rouget de Lisle, l'auteu dé l'Marsellaisse. L'défilé qui baillera (donnera) l'pusse d'ameur (émotion), cha s'ra ch'ti ed 1919. In veut célébrer l'victoire aprés 4 années d'terripe et horripe guerre. L'défilé i c'minche pa les maréchaus à blanc qu'vau, arcoverts ed médalles (ah bon i sont dallés au fu ?) , fiers-culs d'leu victoire, suis pa l'z'armées alliées qui défilte pa orte alfabétike pis driére eine ripopée d'gins bénaches suit in allotant leu bras et in s'agozillant d'plaisi.

In 1936, ch'est l'Front populaire. In arprind l'grante tradicion révolucionnaire édon l'14 juillet ch'est l'jour d'l'espérince, dé l'fraternité, de l'communion inter gins. Cha va pon durer. In 1940, el jour i s'ra férié mais cha ein jour trisse, ein jour ed deul. Sauf qu'in Inguelterre, les frinçais dé l'France Lipe i vont l'célébrer à leu manière. De Gaulle i dira à l'radio qué ch'jour là i dot êt' l'jour ed deul mais aussi jour dé l'promesse, à faire pa tous les frinçais, ed résister pa tous les moyins, pou arriver à gangner l'guerre. Cinq ans pu tard, les troupes alliées alles vont défiler dé l'Nacion à l'Bastile pis à l'Arc ed Triomfe. Cha été eine fiête ed liesse populaire sin parelle, eine fiête d'espérince in d'méïeus jours. Comme toudis, l’peupe bin naïeu (naïf) i réve ….

Dpu ch'jour là, el 14 juillet, à Paris et les grantes villes, in va touiller (mélanger) les défilés des cope-vinte (coupe-vente =militaires) et les berlusages (ocore amus'mints) populaires à l’gloère d’l’istoire et valeus républicaines. L’Etat, i n’d’in proufite pou bailler (donner) d’rales (rares) médalles à chés combattants obliés din l'distribucion qui, eusses, i l'ont gangné chint fos ; mais i baille chint fos pusse ed Légion d'Honneu à chés artisses, sportifs, hauts foncsionnaires qui eusses l'ont gangné bin à l'coïette, in n'fasant foque leu ouvrache.

L'soèr du 13 ocore du 14 juillet, su les plaches d'nos cités et villaches, padzou d'belles guirlantes leumées in bleu,blanc, rouche in a plaisir à alloter ses gampes au son d'l'accordéoneu (in l’appelle aussi saqueu d'rincrincrin ) et du guisterneu (jueu d'violon).
Pis din l'noirté, jonnes et vius, in ravise chés fusées buquer din l'ciel in f'sant pleines ed pettes ed fu ! Aaah l'belle bleusse !
Mais dins l’Nord, in est bin lon (loin) des sins maronnes (sans culotte) dé l’révolucion ! L'fiête alle arsanne (ressemble) au carnéval ! L’an deurnier, des gins déguisés in glaines
(poules), i s'sont pourméné ( promené) in allotant ( agitant) d'longs hauts parapluies comme à Dunkerque !
Tiot Rital Récueul "Histoires dreules d'France"