Colette, chanson

COLETTE
Chanson d' Alexandre Desrousseaux

Eun' jeun' fill' qu'on appell' Colette,
Et qui reste din min quartier,
N'a pour vive et faire s'toilette
que l'gain gi’li rapport' sin métier.
J'ai l'idée d'vous dire s'n histoire.
J'aim' les p'tits, les pauv,les soufrants
Mainq' ti'des gins pour vanter l'gloire
des heureux, des riche'et des grands!

Et v’la' l'simple histoire de Collette,
Cheull' fill' in r'nom su St Sauveur,
Conm’ dins l'vieux quartier de Plachette,
Pour sin bon cœur,
Et s’bielle humeur.

Elle est couturière à l' machine.
Quoique ouvrant ferme, ch'est plaisi
D' vir, mes gins, comme elle a bonn' mine
Eun' biell' gaîté, l'air sans souci.
Aimant par dessus tout, l' musique,
Ell' cante, et sans s'égosiller.
Ch' n'est point l' piano, mais s' mécanique,
Qui li sert pour s'accompagner.

Et v'là l' gai savoir de Colette,
Cheull' fille in r'nom su' Saint-Sauveur
Comm' dins l' vieux quartier de l' Plachette,
Pour sin bon cœur,
Et s' bielle humeur.

On peut dir' qu'elle a du mérite.
Sans l'argint d' personne, à grands frais,
De l' petit' cambre qu'elle habite,
Elle a fait comme un petit palais.
Mobilier, lit'ri's, tout vient d'elle,
Et j' vous jur' qu'i n' li manque rien.
Point même un compagnon fidèle,
Gai comme elle, un p'tit canarien.

Et v'là tout l' fortune d' Colette,
Cheull' fille in r'nom su' Saint-Sauveur
Comm' dins l' vieux quartier de l' Plachette,
Pour sin bon cœur,
Et s' bielle humeur.

Dins les noce' et dins les r'vidiaches,
Toudis, ch'est elle l' boute-in-train.
Ell' rind surtout les gins bénaches,
Quand elle y cante un joyeux r'frain.
On l' demande souvint pour marraine ;
D'êt' sin compère on s' fait d' l'honneur,
Et l'infant, qu'au baptême, ell' mène,
On prétind qu'il a du bonheur.

Et v'là chin qu'on pinse d' Colette,
Cheull' fille in r'nom su' Saint-Sauveur
Comm' dins l' vieux quartier de l' Plachette,
Pour sin bon cœur,
Et s' bielle humeur.

Quand eun' gin dins sin voisinache,
Vient malade et s' trouv' dins l' besoin,
Tout près d'elle, ell' porte s'n ouvrache.
Et, jour et nuit, li donn' du soin.
On prétind qu'à pus d'un malade,
Donnant pour tout r'mède, s' gaîté,
Comme un aut' sert de l' limonade,
Elle a souvint rindu l' santé.

Et v'là l' scieince et l'esprit d' Colette,
Cheull' fille in r'nom su' Saint-Sauveur
Comm' dins l' vieux quartier de l' Plachette,
Pour sin bon cœur,
Et s' bielle humeur.

Après tout cha faut-i vous dire,
Qu'avecque l' pus bonne intention,
Pus d'un garchon pour ell' soupire,
Et, quéq'fos, fait s' déclaration ?
C'est pour eusse eun' peine inutile,
Car cheull' fille a promis s'n amour
Au caporal-clairon Mimile...
Elle attind, pou' s' marier, sin r'tour.

Et v'là les amours de Colette.
Cheull' fille in r'nom su' Saint-Sauveur
Comm' dins l' vieux quartier de l' Plachette,
Pour sin bon cœur,
Et s' bielle humeur.