Les jardinsL'cheinturon jaune
par klavzer jean marie le, 26/03/2006L’cheinturon
Henri i étot in tiot peu bas du cul, in disot même qui mesurot pas gramint pus qu’unne pugnée d’pouche. S’man ale avot du l’assir su un tonnieau quand i étot jonne. Tout l’année Henri i avot sin béret collé su s’tiête, unne maronne ed toile bleu ténue par un cheinturon jaune qui fejot, au moins, cate doigts d’larche.
Pindant chés grandes grèves ed carante uit ché li qui portot ch’drapeau din les défilés, ch’étot un méneux un tiot peu mordreux su chés bords. Chés gardes mobiles is voulotent rintrer su ch’carau d’el fosse onze . Henri avec ses comarates i étot monté su ch’mur pour leu jech’ter des caillaux et des biscaïens , cha dégringolot comme à Gravelotte. Seulemint les autes is ont invoïé des gas, cha puot dins tout l’cité. Du cop chés grévisses is ont sauté in bas de ch’mur, Henri i a ripé du mauvais coté et i est resté incrinqué par sin cheinturon à unne des lanternes qu’i avot à l’intrée. Chés gardes is ont voulu l’cueillir comme unne pronne, seulemint Henri i ruot comme un kévau, i a un gars qui s’a fait rectifier s’portrait par un cop d’godasse à claus. Ch’t’affaire ale l’a conduit in prijon unne paire de s’maines, i étot pas tout seu malheureusemint.
Os veillez mes gins, quand in a arvu Henri avec sin nouviau cheinturon, et ben in étot fier qui restot dins nou rue.
