Vive Mariache

VIVE MARIACHE
chanson de Jules Mousseron

I

Pardon, mes gins, si j' sus pompette!
J'arriv' dé l' noçe à Jacqu's bon temps.
Ah! queu plaisi, nom d'eun' trompette!
Chacun s'in souviendra longtemps.
Jacqu', qui s' mariot avec Théresse,
Est tout à fait dé m'parin­té:
ch'est l' cousin d' l'amoureux dé m' nièce;
J'étos bin sûr d'être invite.

Refrain

Queull' noç' ! queu plaisi qu' j'ai eu!
J' crios comme un perdu:
Viv' mariache! Core un ménache
Ed pris au lache!"
J' vous assur' qué j'ai mingé
Et bu comme un inragé.
Jamais j' n'ai vu d' banquet pa­rel
Ed sous l' solel!

II

J'faisos couple avec eun' donzelle
Qu'ail' pésot bin cent vingt ki­los.
In li f'sant d'l'oeil in cul d'boutelle,
Jé l'ai charmé du premier cop!
Ç'fille ail' mé perdot pour un riche:
J'n'étos pas mal in véri­té;
J'avos m' nué costume, eun' quémiche
In toile ed premièr' quali­té

III

A la mairi', l'adjoint au maire
Avot s' cheintur' couleur drapeau.
I fait s' discours. Jacqu', pou s' distraire,
I mâchot les bords dé s' capiau.
Si vous arot' vu quand Théresse
Allé a prononcé s' fameux « Oui ! »
D'invi', m' gross' gaillarde ed maîtresse
A manqué d' s'écrouler d' sur mi.

IV

Avant d' dîner, in s' met à boire
Eun' douzaine ed petits vermouths.
Après cha, vous pouvez m'in croire,
In étot déjà rond tertout'.
L' dîner étot fort présentape
In avot chacun s' tiête d' viau.
Y-avot deux sortes d' vin à tape,
Et chacun s' terrin' d'haricots.

V

A l'artrouve ej prinds m' connaissance.
Autant fair' danser l' Tour Eiffel !
J' n'étos point d'eun' minut' su danse
Qu'ail' m'aplatissot m' grosse ortel !
Là-d'sus, j'ai lâché m' terri d' terre...
Bin contint dé n' foque êtr' boiteux.
J'ai fini l' noce à boir' dé l' bière
Avec eun' vieill' bind' d'escailleux !