Min Père Noël (I Lampin, S Colliez)

MIN PERE NOËL
Chanson de Isaïe Lampin et Simon Colliez

Des juets au matin pour nous i n’avot pas
Eune oranche, eune quégnotte, eune barre d’ chocolat
Même bien souvint l’ carotte qu’in avot préparé
Là dins l’ fond d’ nou bouttines ale étot core restée
Car il étot tout seul dins l’ temps nou Père Noël
Pour li faire dins eune nuit eune tournée sans parel
Avec sin vieux baudet comme fidèle compagnon
Sin panier à sin dos et pis sin long baton

I m’arriffe core à mi, même apres tant d’années
Comme pour un contint’mint d’arvire min cœur sauter
D’y r’croire comme chés éfants, d’aimer min Père Noël
Qui restera pour mi sur’mint l’ fête l’ plus belle
Comme in le fait tertous dins chés grands évèn’mints
L’ nature al’ mettot sin plus bel habil’mint
Et sin plus biau mantiau là par terre étindu
Comme un vrai tapis d’ouate arcouvrant tout’ chés rues

Chœurs : Noël Noël Noël Noël

Pis le vint d’un seul coup i s’ mettot à courrir
Sifflant dins chés serrures, poussant des longs soupirs
Hurlant pa’ d’sous chés portes, faisant écorner chés beux
Contint comme un éfant qui vient d’ gagner au jeu
Et chés arpes dénudés tout plein d’ give arvétus
Parels à des gatiaux qu’in a mis l’ chuque ed’sus
I z’allongeotent leu bras là bien haut vers le ciel
Comme pour eux applaudir el plus grande des nouvelles

In n’allot pas déhors pour nou r'avot del neiche
In restot bien au caud pour nous préparer l’ crèche
Plaché ch’ pétit Jésus juste au pied de ch’ baudet
Pour qui peuche de s’ n’haleine bien vite eul’ récauffer
Meme ch’ cat l’ journée là in l’ veyot pas sortir
S’ frottant su chés bouttines comme pour les faire arluire
I restot là planté pa’ devant l’ quéminée
Pour attinde avec nous l’ plus longue des soirées

Chœurs : Noël Noël Noël Noël

L’ souper i durot un p’tit peu plus longtemps
Sans chichi, sans manières, sans même un boudin blanc
Souvint pour nous finir eul’ plus biau d’ chés desserts
Eune belle flamique dorée dins l’ plus grante des tourtières
Sur el platine du feu comme eux puvoir juer
Chés marrons tout craqu’lés i s’ mettotent à danser
Répandant l’ sintimint à travers tout’ el maison
Aussi biau qu’in provence ? chés santons

Et les cloches des églisses i s’ méttotent à sonner
In s’ butant l’eune dins l’aute comme pour es’ récauffer
Guidant nou Père Noël perché su sin nuache
S’in allant dins l’ frodure pour sin plus long voyache
Et me v’là aujourd’hui cinquante années in plus
Des Père Noël asteure in n’in vot plein chés rues
Ale télé dins l’ gazette dins chés grands magasins
S’ mettant su chés photos avec tous nos gamins

Chœurs : Noël Noël Noël Noël

Et pourtant in vot core sur el bord d’un trottoir
Un éfant suppliant, si triste dins sin regard
Cachant après ch’ l’étoile qui luit pour li dins l’ ciel
Car il a l’ drot aussi à sin tchiot Père Noël
Si tous chés Pères Noël pouvotent s’ donner la main
Si i pouvot l’ nuit là oublier sin chagrin
Serrer su sin p’tit cœur un p’tit rien un juet
Pour qu’au moins sin malheur seuche moins lourd à porter