le p'tit quinquin, l'canchon dormoire

paroles et musique 1853
d'Alexandre Desrousseaux 1820-1892

refrain :
Dors min p'tit quinquin
Min p'tit pouchin
Min gros rogin
Te m'feras du chagrin
si té n'dors point ch'qu'à d'main


Ainsi l'aute jour eune pauf' dintelière
In amiclotant sin p'tit garchon
Qui d'pis tros quarts d'heures n'faijot que d'braire
Tâchot d'l'indormir par eune canchon
Elle li dijot "min narcisse
D'main t'aras du pain d'épice,
Du chuque à gogo
Si qu't'es sache et qu'te fais dodo."

refrain

Et si te’m’laiches faire eune bonne semaine
J’irai dégager tin biau sarrau
Tin patalon d’drap, tin gilet d’laine,
Comm’un p’tit Milord te s’ras faraud !
J’t’acatrai, l’jour d’eul’ducasse
Un polichinelle cocasse
Un turlututu
Pour juer l’air du capieau pointu

refrain

Nous irons dins l'cour, Jeannette-à-Vaques
Vir les marionnettes comme te riras
Quind t'indindras dire un doupe pou Jacques
Par l'polichinelle qui parle maga
Té li mettras dins s'menotte
Au lieu d’doupes un rond d'carotte
Il t'dira merci
Parce comme nous arot du plaisi !

refrain

Et si par hasard sin maîte i s’fâche,
Ch’est alors Narcisse que nous rirons
Sans n’avoir invie, j’prindrai m’n’air mache
J’li dirai sin nom et ses surnoms
J’li dirai des fariboles
I m’in répondra des drôles
Infin un chacun
Verra deux pestaques au lieu d’un

refrain

Alors serre tes yux, dors min bonhomme
J'vas dire eun'prière à p'tit Jésus
Pou qu’i vienne ichi, pindint tin somme
T'faire rêver qu'j'ai les mains pleines d'écus
Pou qu'i t'apporte eune coquile
Avec du chirop qui guile
Tout l'long d’tin minton
T'eut'pourléqueras tros heures du long

refrain

L’mos qui vient, d’Saint-Nicolas ch’est l’fête
Pour sûr au soir i viendra t’trouver
I t’f’ra un sermon et t’laich’ra mette
In-d’sous du ballot un grand painier
I l’rimplira si t’es sach’
D’sait-quoi qui t’rindront bénache
Sans cha sin baudet
T’invoira un grand martinet

refrain

Ni les marionnettes, ni l’pain d’épice
N’ont produit d’effet; mais l’martinet
A vite rappajé eul’p’tit Narcisse
Qui craignot d’vir arriver l’baudet
Il a dit s’canchon dormoir
S’mère l’a mis dins s’n’ochennoire
A r’pris sin coussin
Et répété vingt fos ch’refrain

refrain