El' tarte

Ch'étot in 1931 :
El' tarte
poésie d'André Ratte

Ch'étot du temps du vieux Bon Dieu
un temps d'avint les " maths modern' "
A ch't'époque là, d'sus l'plach' Poterne
In veyot cor des k'viaux d'brasseux
Ch't'eun' vieill'affaire !

Dins in villach' des invirons
Un mait' d'école ed l'ancien temps
Expliquot à eun' band' d'albrauns
Commint qu'in fait eun' division.
I'avot d'l'ouvrache !

Pou qu'les arsou's comprinchtent bin
El démotié, el tiers, el quart
Et, cor pu dur, el nomb'ed parts
I cachot tout's sort's ed moyens.
Ch'tot eun bon mait' !

Et pou finir l'démonstration
I dessinot au tableau noir
Un rond, ch'tot l'tarte, fallot savoir
Comme el fromach',l'mett' in portions.
In v'là cor eun !
Chacun busiot à c'qui voulot
Au chuqu', à prones ou au papin
A l'castonat'…, mais à la fin
Fallot montrer l'bout qu'té saquos.
Et bin ch'est bon !

Coper in quat,in six,cha va
Si té n'weffes pas comme un blatier
Té peux toudis y arriver
Té vas pianne piann, sans trop d'dégâts
J'té veux bin croire !

Mais quand y faut coper in sept
Là ch'n'est pu l'même : J'ose affirmer
Qu'ché cor pu dur qué d'artreuver
L'carrette à moules à Cafougnette
Ej l'arplach'rai !

Aussi c'jour là ech' mait' prudent
I n'a pas fait d'rond au tableau
Ch'est alors qué l'pétieux Moyaux
In lévant s'dogt dit poliment
V'là un bon fieu !

" Aujord'hui, mi n'partach' pas l'tarte "
L'instituteur un peu surpris
Mais fin bénache del'répartie
Li répondit dins s'biau parlache
" Accoute ichi "

" Vous êtes six, à ta maison,
Tes parents, tes trois sœurs et toi
Au moment d'la galette des rois
Ta maman n'se pose pas d'questions
Assurémint.

Mais imagine qu'ta cousine d'Artis
Arrive alors qu'on n'l'attend pas.
Que fait ta mère dans ce cas là ? "
" Bé, ché bin simp'al muche el tarte ! "